நீலகிரியில் குளுகுளு காலநிலையை அனுபவிக்க குவியும் சுற்றுலாப் பயணிகள்

நீலகிரி : நீலகிரி மாவட்டத்தில் நிலவும் குளுகுளு காலநிலையை அனுபவிக்க, இங்குள்ள சுற்றுலா தலங்களில் சுற்றுலாப் பயணிகள் தொடர்ந்து குவிந்து வருகின்றனர். 



நீலகிரி மாவட்டத்தில் தற்போது சராசரியாக குறைந்தபட்ச வெப்பநிலையாக 5 டிகிரி செல்சியசும், அதிகபட்சமாக 18 டிகிரி செல்சியஸ் வெப்பநிலையும் காணப்படுகிறது. இந்த காலநிலையினை அனுபவிக்க தமிழகத்தின் பல்வேறு பகுதிகள் மட்டுமில்லாது கேரளா, கர்நாடக மற்றும் வடமாநிலத்தை சேர்ந்த சுற்றுலாப் பயணிகள் நீலகிரி மாவட்டத்தில் உள்ள சுற்றுலா தலங்களுக்கு வர தொடங்கி உள்ளனர். 

குறிப்பாக, உதகையில் உள்ள தொட்டபெட்டா, தாவரவியல் பூங்கா, குன்னூரில் உள்ள டால்பின்நோஸ், லேம்ஸ்ராக், சிம்ஸ்பூங்கா, காட்டேரிப் பூங்கா உள்ளிட்ட சுற்றுலா தலங்களை காண்பதற்கு சுற்றுலாப் பயணிகள் அதிக ஆர்வம் காட்டி வருகின்றனர். மேலும், சுற்றுலாப் பயணிகளை வரவேற்கும் விதமாக தட்பவெப்பநிலையும் நிலவி வருகிறது. அதிகாலை நேரங்களில் லேசான பனிப்பொழிவும், பகல்நேரங்களில் சில்லென்று இதமான காற்றும் வீசுகிறது. இதனால், உதகைக்கு வரும் சுற்றுலாப் பயணிகள், இங்கு பல வண்ணங்களில் பூத்துக் குலுங்கும் மலர்களையும் கண்டு ரசித்து செல்கின்றனர்.