பிளஸ் 1 பொது தேர்வின் முடிவுகள் வெளியீடு: 91.3 சதவீதம் மாணவ, மாணவிகள் தேர்ச்சி

முதல் முறையாக இந்த ஆண்டு நடத்தப்பட்டுள்ள, பிளஸ் 1 பொது தேர்வின் முடிவுகள் இன்று வெளியிடப்பட்டுள்ளன. இதில், 91.3 சதவீதம் மாணவ, மாணவிகள் தேர்ச்சி பெற்றுள்ளனர்.

மார்ச் மாதம் தொடங்கி ஏப்ரலில் முடிந்த இந்தத் தேர்வை மொத்தம் 8.61 லட்சம் மாணவ - மாணவியர் எழுதினர். விடைத்தாள் திருத்தும் பணிகள் முடிவடைந்து, விடைத்தாள் மதிப்பீடு செய்யப்பட்டு மதிப்பெண்கள் கம்ப்யூட்டரில் பதிவு செய்யும் பணி முடிவடைந்ததது. இதையடுத்து, தேர்வு முடிவுகள் இன்று வெளியிடப்பட்டுள்ளன.

இதில், 91.3 சதவீதம் மாணவ, மாணவிகள் தேர்ச்சி பெற்றுள்ளனர். மாணவர்கள் 87.4 சதவீதம் பேர் தேர்ச்சியடைந்துள்ளனர். மாணவிகள் 94.6 சதவீதம் பேர் தேர்ச்சி பெற்றுள்ளனர். 36,380 மாணவ, மாணவிகள் 600 க்கு 500 மதிப்பெண்கள் பெற்றுள்ளனர். 188 அரசு பள்ளிகள் 100 சதவீதம் தேர்ச்சி பெற்றுள்ளன.

97.3 சதவீதம் தேர்ச்சி விகிதத்துடன் ஈரோடு மாவட்டம் முதலிடத்தில் உள்ளது. 96.4 சதவீதம் தேர்ச்சி விகிதத்துடன் திருப்பூர் 2-வது இடத்திலும், 96.2 சதவீதம் தேர்ச்சி விகிதத்துடன் கோவை 3-வது இடத்திலும் உள்ளன.