இஸ்ரோவின் ராக்கெட் என்ஜினை தயாரிக்கும் எல்&டி நிறுவனம்

விண்வெளியில் சாதனை படைத்து வரும் இஸ்ரோவின் ராக்கெட் என்ஜினை தயாரிக்கும் ஒப்பந்தத்தை எல்&டி நிறுவனம் பெற்றுள்ளது.

கோவையில் செயல்பட்டு வரும் பிரபல எல்&டி நிறுவனம் சுமார் 40 ஆண்டுகளாக இஸ்ரோவிற்கு தேவையான உதிரி பாகங்களை செய்து வருகிறது. எஸ்.எல்.வி., ராக்கெட் மற்றும் பிரமோஸ் ஏவுகணைகளுக்குத் தேவையான ஏர்பிரேமை தயாரித்து வழங்கி வந்தது. இந்த நிலையில், இஸ்ரோவின் ராக்கெட் என்ஜினை தயாரிக்கும் பணியையும் எல்.அன்.டி.யின் பாதுகாப்பு பிரிவு பெற்றுள்ளது.

ஆகாஷ் ஏவுகணைக்காக ஆயிரமாவது ஏர்பிரேம் தயாரிக்கப்பட்ட பெருமையை போற்றும் வகையில் எல்&டி நிறுவனத்தின் சார்பில் நிகழ்ச்சிக்கு ஏற்பாடு செய்யப்பட்டது. அதில், கலந்து கொண்ட எல்&டி நிறுவனத்தின் வாரிய உறுப்பினர் ஜெயந்த் பாட்டீல் பேசுகையில், "வதோதராவிலும் இஸ்ரோவின் என்ஜின் தயாரிக்கும் பிரிவு செயல்பட்டு வருகிறது. வரும் காலங்களில் என்ஜினின் தேவைகள் அதிகம் இருப்பதால், தற்போது, கோவையிலும் என்ஜின் தயாரிக்கும் பிரிவை தொடங்க முடிவு செய்யப்பட்டுள்ளது. கட்டமைப்புகளும், தேவையான மூலப்பொருட்களும் சிறப்பானவையாக அமைந்திருப்பதால், இந்தப் பிரிவை தொடங்கக் கோவை தேர்வு செய்யப்பட்டுள்ளது," என்றார்.