News

கோவையில் 10 மூட்டை போதைப்பொருள் பறிமுதல்: 3 பேர் கைது

SimpliCity News Team · 24 hours ago

Coimbatore: கோவையில் பெருமளவிலான குட்கா, புகையிலைப் பொருட்களை பதுக்கி வைத்து விற்பனை செய்த வழக்கில் இருவரை போலீசார் கைது செய்துள்ளனர். மேலும் தலைமறைவான இருவருக்கு வலைவீச்சு நடத்தி வருகின்றனர்.

கோவை இடையர் வீதியில் போதைப் பொருட்கள் பதுக்கி விற்கப்படுவதாக போலீசாருக்கு ரகசியத் தகவல் கிடைத்தது. இதையடுத்து வெரைட்டி ஹால் ரோடு போலீசார் சோதனை நடத்தினர். இந்த சோதனையில் மலுமிச்சம்பட்டியைச் சேர்ந்த அச்சுதராஜன் (48), புதுக்கோட்டையைச் சேர்ந்த பிரதீப் (28) ஆகியோர் பிடிபட்டனர்.

அச்சுதராஜன் மற்றும் பிரதீப் கொடுத்த தகவலின் பேரில் போலீசார் மேலும் விசாரணை நடத்தினர். இதில் போத்தனூர் குடோன் மற்றும் ஒத்தக்கால்மண்டபத்தில் பதுக்கி வைக்கப்பட்டிருந்த 10 மூட்டை ஹான்ஸ், கூல்-லிப், விமல், கணேஷ், வி1 புகையிலை உள்ளிட்ட தடை செய்யப்பட்ட போதைப் பொருட்கள் கூண்டோடு பறிமுதல் செய்யப்பட்டன.

இந்த வழக்குடன் தொடர்புடைய தலைமறைவான ராமச்சந்திரன், மகேந்திரன் ஆகியோரை போலீசார் தீவிரமாகத் தேடி வருகின்றனர்.

இதேபோன்று சரவணம்பட்டி-துடியலூர் சாலையில் பெட்டிக்கடை அருகே கூல்-லிப் மற்றும் ஹான்ஸ் பாக்கெட்டுகளை பதுக்கி விற்ற தேவகோட்டையைச் சேர்ந்த மதன் (21) என்பவரை சரவணம்பட்டி போலீசார் கைது செய்தனர். இந்த வழக்கில் தப்பியோடிய விக்னேஷ் என்பவரை போலீசார் தேடி வருகின்றனர்.

Coimbatore tobacco seizure drug bust police arrest Variety Hall Road Saravanampatti gutka ban

கோவையில் 10 மூட்டை போதைப்பொருள் பறிமுதல்: 3 பேர் கைது

Related stories