திருப்பூரில் மூன்று நாள் கேரம் ரேங்கிங் போட்டிகள் நடைபெறுகிறது. வெற்றி பெறுவோர் தேசிய அளவில் தமிழ்நாடு அணி சார்பாக விளையாட தேர்வு செய்யப்படுவர். தமிழகம் முழுவதும் இருந்து சுமார் 670 வீரர்கள் பங்கேற்கின்றனர்.
திருப்பூர்: திருப்பூர் கூலிபாளையம் அருகே உள்ள தனியார் பள்ளியில் திருப்பூர் கேரம் அசோசியேஷன் சார்பாக கேரம் ரேங்கிங் போட்டிகள் இன்று தொடங்கி வருகின்ற ஞாயிற்றுக்கிழமை வரை மூன்று நாட்கள் நடைபெறுகிறது.
இந்த போட்டியில் தமிழகம் முழுவதும் இருந்து வீரர்கள் மற்றும் வீராங்கனைகள் கலந்து கொள்கின்றனர். ஆண்கள் பிரிவில் 350 பேரும், பெண்கள் பிரிவில் 250 பேரும், இரட்டையர் பிரிவில் சுமார் 70 பேரும் என மொத்தம் 670 பேர் கலந்து கொள்கின்றனர். ஆண்கள் சீனியர், பெண்கள் சீனியர், ஆண்கள் இரட்டையர் என மூன்று பிரிவுகளில் போட்டிகள் நடைபெறுகின்றன.
இந்த போட்டியில் வெற்றி பெற்று முதல் ஆறு இடங்களைப் பிடிப்பவர்கள் தமிழ்நாடு சார்பாக தேசிய அளவில் நடைபெறும் போட்டியில் பங்கேற்க தேர்வு செய்யப்படுவார்கள்.
இது தமிழ்நாட்டின் கேரம் வீரர்களுக்கு தேசிய அளவில் தங்கள் திறமையை வெளிப்படுத்த ஒரு சிறந்த வாய்ப்பாக அமையும்.
போட்டியில் வெற்றி பெற்ற அனைவருக்கும் கோப்பைகள் மற்றும் சான்றிதழ்கள் வழங்கப்படும். வருகின்ற ஞாயிற்றுக்கிழமை நடைபெறும் இறுதிப் போட்டியில் திருப்பூர் மாவட்ட ஆட்சித்தலைவர் இவற்றை வழங்க உள்ளார். இந்த நிகழ்வு திருப்பூரில் கேரம் விளையாட்டின் வளர்ச்சிக்கும், இளம் வீரர்களை ஊக்குவிப்பதற்கும் ஒரு முக்கிய படியாக அமையும் என எதிர்பார்க்கப்படுகிறது.