கோவையில் ஆதிதிராவிடர் மற்றும் பழங்குடியினருக்கு எதிரான வன்கொடுமைகள் குறித்து புகார் அளிக்க கட்டணமில்லா எண் அறிமுகம்

கோவை: கோவை மாவட்ட ஆட்சியர் கிராந்தி குமார் பாடி இன்று (அக்டோபர் 9) வெளியிட்டுள்ள செய்திக்குறிப்பில், ஆதிதிராவிடர் மற்றும் பழங்குடியினருக்கு எதிரான வன்கொடுமைகள் குறித்து புகார் அளிக்க கட்டணமில்லா தொலைபேசி எண் அறிமுகப்படுத்தப்பட்டுள்ளதாக தெரிவித்துள்ளார்.

2023-24 ஆம் ஆண்டு சட்டப்பேரவையில் ஆதிதிராவிடர் மற்றும் பழங்குடியின நலத்துறை மாநில கோரிக்கையின் போது, அமைச்சர் அளித்த அறிவிப்பின்படி இந்த நடவடிக்கை எடுக்கப்பட்டுள்ளது. இதன்படி, ஆதிதிராவிடர் மற்றும் பழங்குடியினருக்கு எதிரான வன்கொடுமைகள் குறித்து புகார் அளிக்க சட்ட ஆலோசனைகள் வழங்கவும், தொழில்நுட்ப வசதிகளுடன் கூடிய உதவி மையம் அமைக்கப்படும் என அறிவிக்கப்பட்டது.

தமிழகத்தில் ஜாதி வன்கொடுமைகளால் பாதிக்கப்பட்ட ஆதிதிராவிடர் மற்றும் பழங்குடியினர் இனத்தைச் சேர்ந்தவர்கள் மற்றும் பாதிக்கப்பட்டவர்கள் சார்பாக தகவல் தெரிவிப்போர், வழக்கு பதிவு செய்தல் மற்றும் முறையீடுகளை, 18002021989 என்ற கட்டணமில்லா எண்ணை பயன்படுத்தி புகார்களை பதிவு செய்யலாம். இந்த சேவை அரசு விடுமுறை நாட்கள் தவிர்த்து, அலுவலக நாட்களில் அலுவலக நேரத்தில் கிடைக்கும் என்று மாவட்ட ஆட்சியர் தெரிவித்துள்ளார்.

இந்த முயற்சி, ஆதிதிராவிடர் மற்றும் பழங்குடியினருக்கு எதிரான வன்கொடுமைகளை தடுப்பதற்கும், பாதிக்கப்பட்டவர்களுக்கு உடனடி உதவி வழங்குவதற்கும் உதவும் என எதிர்பார்க்கப்படுகிறது.