பருத்தி மீதான இறக்குமதி வரியை நீக்க வேண்டும் - இந்திய பருத்தி கூட்டமைப்பின் வேண்டுகோள்

Coimbatore: கோவையை தலைமையிடமாக கொண்டு செயல்படும் இந்திய பருத்தி கூட்டமைப்பின் (Indian Cotton Federation) 45வது ஆண்டு பொதுக்குழு கூட்டம் இன்று GKS காட்டன் சேம்பர்ஸில் நடைபெற்றது.

இந்த கூட்டத்தில் ஜே.துளசிதரன் 2024-25 ஆம் ஆண்டிற்கான தலைவராக தேர்ந்தெடுக்கப்பட்டார். துணைத் தலைவர்களாக பி.நடராஜ், ஆதித்ய கிருஷ்ணா பதி ஆகியோர் தேர்வு செய்யப்பட்டனர். நிஷாந்த் ஏ. ஆஷர் மற்றும் சேத்தன் எச்.ஜோஷி ஆகியோர் முறையே ICF இன் கெளரவ செயலாளராகவும், கெளரவ இணைச் செயலாளராகவும் பணியாற்ற உள்ளனர்.

கூட்டத்தில் பேசிய ஜே.துளசிதரன், கடந்த நிதியாண்டு ஜவுளித் துறைக்கு மிகவும் சவாலானதாக இருந்ததாகக் குறிப்பிட்டார். தொழில்துறையும், விவசாயிகள் நலனும் செழிக்க பருத்தி விளைச்சல் மேம்பட வேண்டும் என்றும், 2024-25 காலகட்டத்தில் பருத்தி விளைச்சல் நன்றாக இருக்கும் என்று கணிக்கப்பட்டுள்ளதாகவும் தெரிவித்தார்.

தற்போதைய மதிப்பீடுகளின்படி, பருத்தி பயிரின் அளவு கடந்த 2023-24 காலத்தை விட அதிகமாக இருக்கும் என்றும், 330-340 லட்சம் பேல்கள் வரை பருத்தி கிடைக்கும் என்று எதிர்பார்க்கப்படுவதாகவும் அவர் கூறினார்.

ஆனால், பருத்தி மீதான இறக்குமதி வரி காரணமாக இந்தியாவில் பருத்தியின் விலை உலக அளவில் உள்ள விலையை விட அதிகமாக உள்ளதாக அவர் சுட்டிக்காட்டினார். இது விவசாயிகளுக்கும் தொழில்துறைக்கும் பாதகமானது என்பதால், அரசு தலையிட்டு தீர்வு காண வேண்டும் என்று வலியுறுத்தினார்.

தொழில் வளர்ச்சிக்கு மூலப்பொருள் பாதுகாப்பு மற்றும் குறைந்த வட்டி விகிதத்தில் நிதி அவசியம் என்றும் அவர் கூறினார். பருத்தி மீதான இறக்குமதி வரியை நீக்க வேண்டும் என்பது ICF-ன் முக்கிய கோரிக்கையாக முன்வைக்கப்பட்டது.

ICF-ன் கௌரவச் செயலாளர் நிஷாந்த் ஆஷர், "இறக்குமதி வரி காரணமாக இந்தியாவில் பருத்தி விலைகள் உலக விலையை விட அதிகமாக உள்ளன. இந்திய ஜவுளித் தொழில் வளர்ச்சியடையும் வகையில், இறக்குமதி வரியை நீக்குமாறு அரசை நாங்கள் கேட்டுக்கொள்கிறோம்" என்று தெரிவித்தார்.