மீலாதுன் நபி திருநாளில் எடப்பாடி பழனிசாமியின் வாழ்த்து: இஸ்லாமிய சமூகத்திற்கு அன்பு மற்றும் சகோதரத்துவம் வலியுறுத்தல்

அதிமுக கழகப் பொதுச் செயலாளர், சட்டமன்ற எதிர்க்கட்சித் தலைவர், தமிழ் நாடு முன்னாள் முதலமைச்சர் எடப்பாடி K. பழனிசாமி மீலாதுன் நபி திருநாளை முன்னிட்டு இஸ்லாமிய சமூகத்திற்கு வாழ்த்து தெரிவித்துள்ளார்.

தனது எக்ஸ் சமூக வலைதள பக்கத்தில் வெளியிட்ட செய்திக்குறிப்பில், "அண்ணல் நபிகள் நாயகம் அவர்கள் பிறந்த நன்நாளாம் மீலாதுன் நபி திருநாளில், உலகெங்கும் வாழும் அன்பிற்கினிய இஸ்லாமியப் பெருமக்கள் அனைவருக்கும், எனது இதயங்கனிந்த வாழ்த்துகளை மகிழ்ச்சியோடு தெரிவித்துக்கொள்கிறேன்" என்று குறிப்பிட்டுள்ளார்.

நபிகள் நாயகத்தின் போதனைகளை நினைவுகூர்ந்த எடப்பாடி பழனிசாமி, "உண்மையைப் பேசுதல்; தூய எண்ணத்தோடு வாழ்தல்; ஏழை, எளியோருக்கு உதவிபுரிதல்; அனைவரிடத்திலும் அன்புடனும், நற்பண்புடனும் பழகுதல்; புகழையும், அறத்தையும் தராத செயல்களை செய்யாதிருத்தல்" ஆகியவை நபிகள் நாயகம் உலகிற்கு நல்கிய போதனைகள் என்று சுட்டிக்காட்டினார்.

மேலும், இந்த நாளில் நபிகள் நாயகத்தின் போதனைகளைப் பின்பற்றி "அன்பு பெருகவும், அமைதி தவழவும், சமரசம் உலவவும், சகோதரத்துவம் தழைக்கவும் அயராது உழைத்திட உறுதி ஏற்போம்" என்று அழைப்பு விடுத்தார்.

இறுதியாக, "புரட்சித் தலைவர் எம்.ஜி.ஆர்., புரட்சித் தலைவி அம்மா ஆகியோரது நல்வழியில், எனது இதயமார்ந்த மீலாதுன் நபி நல்வாழ்த்துகளை மீண்டும் ஒருமுறை உரித்தாக்கிக் கொள்கிறேன்" என்று தனது வாழ்த்துச் செய்தியை முடித்துக் கொண்டார் எடப்பாடி K. பழனிசாமி.