கோவையில் இருந்து வயநாட்டிற்கு நிவாரணப் பொருட்கள்: மாவட்ட ஆட்சியர் கொடியசைத்து அனுப்பி வைத்தார்

கோவை: கோவை மாவட்ட ஆட்சியர் கிராந்திகுமார் பாடி இன்று வயநாட்டிற்கான நிவாரணப் பொருட்களை கொடியசைத்து அனுப்பி வைத்தார். Virtual Rescue Force (VRF) அமைப்பு மூலம் திரட்டப்பட்ட இந்த பொருட்கள் வெள்ளத்தால் பாதிக்கப்பட்டவர்களுக்கு உதவும் வகையில் அனுப்பப்பட்டுள்ளன.



இந்த நிவாரணப் பொருட்களில் 500 'Back Home' கிட்கள் (அத்தியாவசிய பொருட்கள் அடங்கிய தொகுப்பு), 250 எஃகு தட்டுகள், 250 எஃகு டம்ளர்கள், 46 ஜோடி பூட்ஸ், 50 கிலோ பிளீச்சிங் பவுடர், 500 உள்ளாடைகள், 1000 கையுறைகள் ஆகியவை அடங்கும். ஒவ்வொரு 'Back Home' கிட்டிலும் டவல், படுக்கைத் துணி, நைட்டி/லுங்கி, நாப்கின் (பெண்களுக்கான கிட்), பற்பசை, பற்தூரிகை, சோப்பு, துவைக்கும் சோப்பு, ஷாம்பு, தேங்காய் எண்ணெய் போன்ற பொருட்கள் இடம்பெற்றுள்ளன.



VRF நிறுவனர் டாக்டர் வித்யா ராஜன் கூறுகையில், "வர்ச்சுவல் ரெஸ்க்யூ ஃபோர்ஸ் குழுவினர் இந்தியாவின் பல்வேறு பகுதிகளிலிருந்தும், வெளிநாடுகளில் இருந்தும் முக்கிய பங்களிப்புகளை வழங்கியுள்ளனர். RAAC ரவீந்திரன் தேவைகளுக்கேற்ப NGO-க்களை ஒருங்கிணைத்தார்," என்றார். மேலும் அவர், "கோவை கூட்டமைப்பு, நகரின் பல குடியிருப்புகள், SVHP குடியிருப்பாளர்கள், ஹிரோடெக், ELCE, கோவை மற்றும் CMC மருத்துவர்கள், CMC 98 ஆம் ஆண்டு தொகுதியினர், ரத்தினம் கல்வி நிறுவனங்கள், MESSER ஆகியோர் 'தமிழ்நாடு வயநாட்டிற்காக!' என்ற முழக்கத்துடன் இந்த முயற்சியில் ஒன்றிணைந்து பங்காற்றினர்," என்றும் கூறினார்.





ELCE தலைவர் டாக்டர் பி.எஸ். ராஜன் மற்றும் C4TN மணியன் ஆகியோரும் கொடியசைத்து அனுப்பும் நிகழ்வில் பங்கேற்றனர். MESSER Tools நிறுவனம் 10 வாயு வெட்டிகளையும் இந்த நிவாரணப் பொருட்களுடன் சேர்த்து வழங்கியுள்ளது.