முன்னாள் குடியரசுத் தலைவர் அப்துல் கலாம் பெயரில் கோவையில் பண மோசடி: மாவட்ட ஆட்சியரிடம் புகார்

கோவை: கோவை மாவட்டத்தில் முன்னாள் குடியரசுத் தலைவர் ஏ.பி.ஜே அப்துல் கலாம் பெயரைப் பயன்படுத்தி பண மோசடி நடந்துள்ளதாக பாதிக்கப்பட்டவர்கள் மாவட்ட ஆட்சியரிடம் புகார் அளித்துள்ளனர்.



புகாரின் விவரங்களின்படி, ஸ்ரீ லட்சுமி கார்டன், கீரணத்தம் அஞ்சல், கொண்டயம்பாளையம் ரோடு, கோயம்புத்தூர் என்ற முகவரியில் இயங்கி வரும் "டாக்டர் A.P.J அப்துல் கலாம் பவுண்டேஷன்" என்ற நிறுவனம், மானியத்துடன் கூடிய வட்டியில்லா கடன் வழங்குவதாகக் கூறி மக்களிடம் முன்பணம் பெற்றுள்ளது.

நிறுவனம் பணத்திற்கு ரசீது வழங்காமல், நன்கொடை ரசீது வழங்கியுள்ளது. இது குறித்து கேள்வி எழுப்பியபோது, வருமான வரி பிரச்சினைகளைத் தவிர்க்கவே இவ்வாறு செய்வதாக நிறுவனம் விளக்கமளித்துள்ளது. ஒரு மாதத்திற்குள் வீட்டிற்கு வந்து ஆய்வு செய்வதாகக் கூறிய நிறுவனம், ஆய்வு செய்த பிறகும் பல மாதங்கள் கடந்தும் கடன் வழங்கவில்லை.



முன்பணத்தை திரும்பக் கேட்டபோது, நிறுவனம் தர மறுத்ததோடு, புகார் அளிக்கப் போவதாகக் கூறியபோது அச்சுறுத்தலும் விடுத்துள்ளது. இந்நிலையில், பாதிக்கப்பட்டவர்கள் மாவட்ட ஆட்சியரிடம் புகார் அளித்து, நிறுவனத்தை முழுவதுமாக தடை செய்து, தங்கள் பணத்தை மீட்டுத் தருமாறு கோரியுள்ளனர்.