கோவையில் தொடர் மழை: சுற்றுலா தலங்களுக்கு செல்ல வேண்டாம் - மாவட்ட ஆட்சியர் எச்சரிக்கை

கோவை: கோவை மாவட்டத்தில் தொடர்ந்து பெய்து வரும் கனமழையின் காரணமாக, சுற்றுலா தலங்களுக்கு செல்ல வேண்டாம் என மாவட்ட ஆட்சியர் கிராந்திகுமார் பாடி எச்சரிக்கை விடுத்துள்ளார். மாவட்டத்தில் உள்ள நீர்நிலைகளில் மழைநீர் அதிகரித்து வருவதால், மேற்கு தொடர்ச்சி மலையை ஒட்டிய பகுதிகளில் உள்ள சுற்றுலா தலங்களுக்கு செல்ல வேண்டாம் என ஜூலை 31 அன்று அறிவுறுத்தியுள்ளார்.

மாவட்ட ஆட்சியர் வெளியிட்டுள்ள அறிக்கையில், கோயம்புத்தூர் மாவட்டத்தில் மேற்கு தொடர்ச்சி மலையை ஒட்டியுள்ள வால்பாறை, ஆனைமலை, மேட்டுப்பாளையம், பேரூர் மற்றும் மதுக்கரை ஆகிய வட்டங்களை சுற்றியுள்ள சுற்றுலா பகுதிகளுக்கு செல்ல வேண்டாம் என்று கூறியுள்ளார். குறிப்பாக, சின்னக்கல்லாறு, ஆழியாறு, சோலையாறு, கூலாங்கல்லாறு, அப்பர்நீரார், கீழ்நீரார், காடாம்பாறை, குரங்கு நீர்வீழ்ச்சி, கோவை குற்றாலம், பில்லூர், மற்றும் கீழ் பவானி ஆகிய இடங்களில் தொடர் கனமழை பெய்து வருவதால், நிலச்சரிவு மற்றும் நீரில் மூழ்குதல் போன்ற எதிர்பாராத அபாயங்கள் ஏற்படக்கூடும் என்று எச்சரித்துள்ளார்.

இந்த பருவமழை காலத்தில், மேற்கூறிய பகுதிகளுக்கு சுற்றுலா செல்வதை தவிர்க்குமாறு பொதுமக்களை கேட்டுக் கொண்டுள்ளார். இந்த முன்னெச்சரிக்கை நடவடிக்கை, சுற்றுலா பயணிகளின் பாதுகாப்பை உறுதி செய்வதற்காக எடுக்கப்பட்டுள்ளதாக தெரிவிக்கப்பட்டுள்ளது.