விளாங்குறிச்சி பகுதியில் துப்புரவு பணிகள் குறித்து மாநகராட்சி ஆணையர் நேரில் ஆய்வு

கோவை மாநகராட்சி, கிழக்கு மண்டலத்திற்கு உட்பட்ட 32 வது வார்டு விளாங்குறிச்சி, அம்பேத்கர் நகரில் சூரிய ஒளித் திட்டத்தின் கீழ் செயல்படும் மின்சார தெரு விளக்குகளை மாநகராட்சி ஆணையர் மற்றும் தனி அலுவலர் க.விஜயகார்த்திகேயன் நேரில் சென்று பார்வையிட்டார்.



இதனைத்தொடர்ந்து, அப்பகுதியில் அமைந்துள்ள ஊராட்சி ஒன்றிய தொடக்கப்பள்ளியில் செயல்படும் சமையல்கூட கட்டிடத்தினை ஆய்வு செய்தார். பின், மக்கள் வசிக்கும் பகுதிகளில் மாநகராட்சி துப்புரவு பணியாளர்கள் மக்கும் மற்றும் மக்காத குப்பைகளை பிரித்தெடுக்கும் பணிகளை ஆய்வு செய்தார்.





இதைத்தொடர்ந்து, வீடுகளில் தனி நபர் கழிப்பறை கட்டும் பணிகளையும், கொசு ஒழிப்பு பணியாளர்கள் வீடுவீடாகச் சென்று அபேட் மருந்தை தொட்டிகளில் ஊற்றுவதையும், தேவையில்லாத பொருட்களை அகற்றும் பணியையும் க.விஜயகார்த்திகேயன் ஆய்வு செய்தார். அம்பேத்கர் நகர் பகுதியில் மாநகராட்சி துப்புரவு பணியாளர்கள் சுத்தம் செய்யும் பணிகளில் ஈடுபட்டு வருவதையும் அவர் ஆய்வு செய்தார்.



இந்நிகழ்வுகளின் போது மாநகராட்சி ஆணையர் மற்றும் தனி அலுவலர் க.விஜயகார்த்திகேயனுடன் துணை ஆணையர் ப.காந்திமதி, நகர்நல அலுவலர் கே.சந்தோஷ்குமார், கிழக்கு மண்டல உதவி ஆணையர் ரவிக்குமார் மற்றும் மாநகராட்சி அலுவலர்கள் பலர் உடனிருந்தனர்.