கோவையில் 160-க்கும் மேற்பட்ட பறவைகளின் இனங்கள் கண்டுபிடிப்பு

கோவை : கோவை மாவட்ட வனச்சரகத்திற்குட்பட்ட பகுதிகளில் நடத்தப்பட்ட இருநாள் பறவைகள் கணக்கெடுப்பில், 160-க்கும் மேற்பட்ட பறவைகளின் இனங்கள் கண்டறியப்பட்டுள்ளன. 



கோவை வனச்சரகப் பகுதிகளில் உள்ள 26 குளங்களில் வன அதிகாரிகள் மற்றும் தன்னார்வலர்கள் கலந்து கொண்டு சதுப்பு நிலங்களில் உள்ள பறவைகளை கணக்கெடுத்தனர். இருதினங்கள் நடைபெற்ற இந்தக் கணக்கெடுப்பில் பறவைகளின் இனங்கள் மற்றும் பறவைகளின் எண்ணிக்கைகள் குறித்து ஆய்வு செய்யப்பட்டன. இதில், 160-க்கும் மேற்பட்ட பறவைகளின் இனங்கள் கண்டறியப்பட்டுள்ளன. அவற்றில், 79 இனங்கள் ஈரமான நிலத்தில் வாழ்பவையாகும். 87 இனங்கள் சதுப்பு நிலங்களில் வசிப்பவையாகும். அனைத்துக் குளங்களிலும் கணக்கெடுத்ததன் அடிப்படையில், முதல்நாளில் மட்டும் 6,620 பறவைகள் கணக்கிடப்பட்டுள்ளன.



அதிகபட்சமாக வெள்ளலூர் தண்ணீர் தொட்டி பகுதியில் மட்டும் 89 பறவைகளின் இனங்கள் கண்டறியப்பட்டன. இதேபோல, அதிகபட்சமாக உக்கடம் பெரிய தொட்டிப் பகுதியில் 1,604 பறவைகள் கணக்கிடப்பட்டன.