கோவையில் தொழில் முனைவோரை கழுத்தை அறுத்து கொலை செய்ய முயற்சி

கோவை, நவம்பர் 23

கோவை, பீளமேடு பகுதியில் தொழில் முனைவோர் ஒருவரை கழுத்தை அறுத்து கொலை செய்ய முயன்ற சம்பவம் பரபரப்பை ஏற்படுத்தியுள்ளது. இது குறித்து பீளமேடு காவல்துறையினர் வழக்கு பதிவு செய்து விசாரணை மேற்கொண்டு வருகின்றனர்.

கோவை மாவட்டம், காளப்பட்டி பகுதியைச் சேர்ந்தவர் உஜில் சந்திரன். இண்டீரியர் டெக்ரேசன் செய்வதற்கான உபகரணங்கள், இயந்திரங்களை விற்பனை செய்யும் நிறுவனம் நடத்தி வருகின்றார். இவரிடம் சென்னையைச் சேர்ந்த சிவக்குமார் என்பவர் உபகரணங்கள் வாங்க 4 லட்சம் ரூபாய் கொடுத்து இருந்ததாகக் கூறப்படுகின்றது. ஆனால் பொருட்களை கொடுக்காமல் சந்திரன் காலதாமதம் செய்து வந்த நிலையில், சிவக்குமார் பணத்தை திருப்பிக் கேட்டுள்ளார். இந்நிலையில் கோவை வந்த சிவக்குமாரை தனியாக அழைத்துச் சென்ற சந்திரன், அவரை கழுத்தை அறுத்து கொலை செய்ய முயற்சித்துள்ளார்.

இதில் காயமடைந்த சிவக்குமார் அவரிடம் இருந்து தப்பி வந்து கோவை அரசு மருத்துவமனையில் சிகிச்சைக்காக சேர்ந்துள்ளார். அங்கு அவருக்கு சிகிச்சை அளிக்கப்பட்டு வருகின்றது.

இதுகுறித்து தகவலறிந்த பீளமேடு காவல் துறையினர் வழக்கு பதிவு செய்து தலைமறைவாக உள்ள சந்திரனை தேடி வருகின்றனர்.