கோவையில் தின்பண்டம் என ஏமாற்றி பைக்கில் குட்கா கடத்திய வட மாநில இளைஞர் கைது

கோவை: கோவை ரேஸ்கோர்ஸ் போலீசார் நேற்று (செப்டம்பர் 23) ரோந்து பணியில் ஈடுபட்டிருந்தனர். அப்போது, கோவை மகளிர் பாலிடெக்னிக் கல்லூரி அருகே பைக்கில் வந்த ஒருவரை சந்தேகத்தின் பேரில் நிறுத்தி விசாரணை மேற்கொண்டனர்.

விசாரணையின் போது, அவர் வைத்திருந்த மூட்டையில் என்ன உள்ளது என்று கேட்டபோது, விற்பனைக்காக நொறுக்குத் தீனிகளை கொண்டு செல்வதாக தெரிவித்தார். ஆனால், போலீசார் சந்தேகம் அடைந்து மூட்டையை சோதனையிட்டபோது, அதற்குள் தடை செய்யப்பட்ட குட்கா மற்றும் கூல் லிப் ஆகியவை இருப்பது கண்டுபிடிக்கப்பட்டது. பறிமுதல் செய்யப்பட்ட பொருட்களின் மதிப்பு சுமார் ₹75,000 என தெரிவிக்கப்பட்டுள்ளது.

இதனைத் தொடர்ந்து, போலீசார் குட்கா கடத்தி வந்த நபரை கைது செய்தனர். கைது செய்யப்பட்டவர் டவுன்ஹால் பகுதியைச் சேர்ந்த வட மாநில இளைஞர் சுக்காராஜ் (30) என அடையாளம் காணப்பட்டுள்ளார். மேலும், அவர் பயன்படுத்திய மோட்டார் சைக்கிளும் பறிமுதல் செய்யப்பட்டது.

இச்சம்பவம் குறித்து மேலும் விசாரணை நடத்தப்பட்டு வருகிறது. குட்கா போன்ற தடை செய்யப்பட்ட பொருட்களை கடத்துவது மற்றும் விற்பனை செய்வது குற்றமாகும் என்பதை மக்கள் அறிந்திருக்க வேண்டும் என போலீசார் வலியுறுத்தியுள்ளனர்.