கோவை அரசு மருத்துவர்கள் ஈரோடு தொழிலாளியின் தொடையில் இருந்து துப்பாக்கி குண்டை வெற்றிகரமாக அகற்றினர்

கோவை: ஈரோடு மாவட்டம் அம்மாபேட்டையைச் சேர்ந்த கட்டடத் தொழிலாளி செந்தில் குமார் (45) என்பவரின் வலது தொடையில் மதுபோதையில் ஏற்பட்ட தகராறின் போது ஏர்கன் துப்பாக்கியால் சுடப்பட்ட குண்டை கோவை அரசு மருத்துவக் கல்லூரி மருத்துவமனை மருத்துவர்கள் வெற்றிகரமாக அகற்றினர்.

முதலில் ஈரோடு அரசு மருத்துவமனையில் சிகிச்சைக்காக சேர்க்கப்பட்ட செந்தில்குமார், கட்டுக்கடங்காத ரத்தப்போக்கு காரணமாக கோவை அரசு மருத்துவக் கல்லூரி மருத்துவமனைக்கு மாற்றப்பட்டார். அங்கு எடுக்கப்பட்ட சிடி ஸ்கேனில், ஏர்கன் குண்டு ரத்த நாளத்தை துளைத்து எலும்புக்கு அருகில் தொடையில் ஆழமாக தங்கியிருந்தது கண்டறியப்பட்டது.

நோயாளியின் நிலையை நிலைப்படுத்திய பின்னர், இரத்தநாள அறுவை சிகிச்சை நிபுணர்கள் சிக்கலான அறுவை சிகிச்சையை மேற்கொண்டனர். இதில், சேதமடைந்த ரத்த நாளம் சரி செய்யப்பட்டு, தொடையில் ஆழமாக தங்கியிருந்த துப்பாக்கி குண்டு வெற்றிகரமாக அகற்றப்பட்டது. இதன் மூலம் நோயாளியின் உயிரும் காலும் காப்பாற்றப்பட்டது.

இந்த சிறப்பான சிகிச்சைக்காக, முதல்வர் பேராசிரியர் டாக்டர் அ.நிர்மலா மற்றும் மருத்துவ கண்காணிப்பாளர் பேராசிரியர் டாக்டர் கண்ணதாசன் ஆகியோர் இரத்த நாள நிபுணர்கள் டாக்டர் ப.வடிவேலு, டாக்டர் பா.தீபன்குமார் உள்ளிட்டோரை செப்டம்பர் 20 அன்று பாராட்டினர். தற்போது செந்தில்குமார் முழுமையாக குணமடைந்து வீடு திரும்ப உள்ளார்.