கோவையில் நடைபெற்ற விநாயகர் சதுர்த்தி விழாவில் பேசிய மத்திய இணையமைச்சர் எல்.முருகன், விடுதலை சிறுத்தைகள் கட்சியின் மது ஒழிப்பு மாநாடு குறித்து கருத்து தெரிவித்தார். திமுகவை மிரட்டும் யுக்தியாக இதனை பார்ப்பதாக விமர்சித்தார்.
Coimbatore: கோவை தெப்பக்குளம் மைதானத்தில் இந்து முன்னணி சார்பில் நடைபெற்ற விநாயகர் சதுர்த்தி ஊர்வலத்தை மத்திய இணை அமைச்சர் எல்.முருகன் கொடியசைத்து தொடங்கி வைத்தார். இந்த நிகழ்வில் பேசிய அவர், தமிழ்நாட்டில் 50 ஆண்டுகளாக நடைபெற்று வரும் விநாயகர் சதுர்த்தி விழாக்கள் மிகப்பெரிய எழுச்சியை ஏற்படுத்தி வருவதாகக் குறிப்பிட்டார்.
பாலகங்காதர திலகர் சுதந்திரப் போராட்டத்தின் போது இந்து மக்களிடையே ஒற்றுமையை வளர்க்கவும், வெள்ளையருக்கு எதிராக அணிதிரளவும் இந்த விழாவைத் தொடங்கி வைத்ததாக அமைச்சர் நினைவுகூர்ந்தார். தற்போதைய அரசு இந்து விழாக்களை ஒடுக்க முயற்சிப்பதாகவும், அதிகாரிகள் அனைவரையும் சமமாக நடத்த வேண்டும் என்றும் அவர் வலியுறுத்தினார்.
அமைச்சர் எல்.முருகன் தொடர்ந்து பேசுகையில், இந்தியா வேகமான வளர்ச்சிப் பாதையில் செல்வதாகவும், ஜனசங்கத்தை தோற்றுவித்த சியாம் பிரசாத் முகர்ஜியின் கனவை நிறைவேற்றும் வகையில் பிரதமர் மோடி காஷ்மீரில் 370 பிரிவை நீக்கியுள்ளதாகவும் தெரிவித்தார். உத்தரகாண்டில் பொது சிவில் சட்டம் நவம்பர் முதல் அமலுக்கு வருவதாகவும், பாஜக தனது கொள்கை வாக்குறுதிகளை நிறைவேற்றி வருவதாகவும் குறிப்பிட்டார்.
தமிழ்நாட்டில் கோயில் கட்ட முடியாத நிலை இருப்பதாகவும், அனைவருக்கும் வழிபாட்டு உரிமை இருக்கும்போது விழாக்களுக்கு மட்டும் கட்டுப்பாடு விதிப்பது ஏன் என்றும் அமைச்சர் கேள்வி எழுப்பினார். முதல்வர் ஸ்டாலின் அனைத்து மதங்களையும் சமமாக பார்ப்பேன் என உறுதிமொழி எடுத்திருந்தும், விநாயகர் சதுர்த்திக்கு வாழ்த்து தெரிவிக்காதது ஏன் என்றும் அவர் கேள்வி எழுப்பினார்.
செய்தியாளர்களிடம் பேசிய அமைச்சர், விடுதலை சிறுத்தைகள் கட்சியின் மது ஒழிப்பு மாநாடு குறித்து கருத்து தெரிவித்தார். இது திமுகவுக்கு எதிரான ஒரு மிரட்டல் தொனியாகவோ அல்லது கூட்டணியில் பேரம் பேசும் யுக்தியாகவோ இருக்கலாம் என்று அவர் கருத்து தெரிவித்தார். திருமாவளவன் ஒரு குறிப்பிட்ட சமுதாயத்தின் தலைவர் என்றும், அவர் ஜாதி குறித்து பேசுவதற்கு முன் சுயபரிசோதனை செய்ய வேண்டும் என்றும் அமைச்சர் எல்.முருகன் கூறினார்.