கோவையில் காய்கறி விலை கிடுகிடு உயர்வு: வியாபாரிகள் தகவல்

Coimbatore: கோவை மாவட்டத்தில் தொடர்ந்து பெய்து வரும் மழையால் காய்கறி உற்பத்தி குறைந்துள்ளது. மேலும், வெளி மாவட்டங்கள் மற்றும் மாநிலங்களில் இருந்து கோவைக்கு காய்கறி வரத்து குறைந்துள்ளதால், காய்கறி விலை உயர்ந்துள்ளதாக வியாபாரிகள் தெரிவித்துள்ளனர்.

காய்கறி மார்க்கெட் வியாபாரிகளின் கூற்றுப்படி, தற்போதைய காய்கறி விலைகள் பின்வருமாறு: நாட்டுத்தக்காளி கிலோ ₹90, ஆப்பிள் தக்காளி கிலோ ₹100, பெரிய வெங்காயம் கிலோ ₹50, சின்ன வெங்காயம் கிலோ ₹40, பீன்ஸ் ₹80, அவரை ₹75, பாகற்காய் ₹60, பச்சை மிளகாய் ₹85, முருங்கக்காய் ₹100, சுண்டைக்காய் ₹140 ஆகும்.

மேலும், ஊட்டி உருளைக்கிழங்கு ₹90, கேரட் ₹85, பீட்ரூட் ₹75, குடமிளகாய் ₹75 என்ற விலையில் விற்கப்படுகின்றன. வழக்கமாக குறைந்த விலையில் கிடைக்கும் முட்டைக்கோஸ் தற்போது ₹50க்கு விற்பனையாகிறது. குறிப்பாக, பூண்டு விலை கிலோ ₹254 என அதிகரித்துள்ளது.

பழங்களின் விலையிலும் உயர்வு ஏற்பட்டுள்ளது. மாதுளை கிலோ ₹200, திராட்சை ₹80, மாம்பழம் ₹150, ஆப்பிள் ₹220, ஆரஞ்சு ₹100, சாத்துக்குடி ₹60, அன்னாசிப்பழம் ₹45 என்ற விலையில் விற்கப்படுகின்றன.

வரும் நாட்களில் காய்கறி மற்றும் பழங்களின் விலை குறைய வாய்ப்புள்ளதாக வியாபாரிகள் நம்பிக்கை தெரிவித்துள்ளனர்.