கோவையில் புதிய கட்டிடத்தில் டெங்கு கொசுப்புழு: உரிமையாளருக்கு ₹50,000 அபராதம்

Coimbatore: கோவை மாநகராட்சி கிழக்கு மண்டலம், வார்டு எண் 8-ல் அமைந்துள்ள காளப்பட்டி பிரதான சாலை, மோகன் நகர் பகுதியில் புதிதாக கட்டப்பட்டுவரும் கட்டிடத்தில் சுகாதாரத் துறை அதிகாரிகள் திடீர் ஆய்வு மேற்கொண்டனர்.

இந்த ஆய்வின்போது, கட்டிட வளாகத்தில் தேங்கியிருந்த நீரில் டெங்கு கொசுப்புழுக்கள் கண்டறியப்பட்டன. டெங்கு நோய் பரவலைத் தடுப்பதற்கான முன்னெச்சரிக்கை நடவடிக்கைகளை மேற்கொள்ளாததற்காக, கட்டிட உரிமையாளருக்கு கோவை மாநகராட்சி சார்பில் ரூ.50,000 அபராதம் விதிக்கப்பட்டுள்ளது.

மழைக்காலத்தில் கட்டிட வளாகங்களில் நீர் தேங்குவதைத் தவிர்க்க வேண்டும் என்றும், தேங்கிய நீரை உடனடியாக அகற்ற வேண்டும் என்றும் சுகாதாரத் துறை அதிகாரிகள் வலியுறுத்தியுள்ளனர். கட்டுமான பணிகள் நடைபெறும் இடங்களில் கூடுதல் கவனம் செலுத்த வேண்டும் என்றும் அறிவுறுத்தப்பட்டுள்ளது.

கோவை மாநகராட்சி பகுதியில் டெங்கு கொசு இனப்பெருக்கம் தடுப்பதற்காக தொடர் ஆய்வுகள் மேற்கொள்ளப்பட்டு வருகின்றன. சுகாதாரமற்ற சூழலை உருவாக்கும் கட்டிட உரிமையாளர்கள் மற்றும் வீட்டு உரிமையாளர்களுக்கு எதிராக கடுமையான நடவடிக்கை எடுக்கப்படும் என மாநகராட்சி அதிகாரிகள் எச்சரித்துள்ளனர்.

பொதுமக்கள் தங்கள் வீடுகள் மற்றும் சுற்றுப்புறங்களில் நீர் தேங்காமல் பார்த்துக் கொள்ள வேண்டும் என்றும், குப்பைகளை சரியான முறையில் அகற்ற வேண்டும் என்றும் சுகாதாரத் துறை கேட்டுக்கொண்டுள்ளது.