கோவை மாவட்டத்தில் மாற்றுத்திறனாளிகள் கணக்கெடுப்பு செப்டம்பர் 2026 வரை நடைபெறும்

Coimbatore: கோவை மாவட்டத்தில் மாற்றுத்திறனாளிகள் நலத்துறையின் மூலம் தமிழ்நாடு உரிமைகள் திட்டத்தின் கீழ் விரிவான சமூக தரவுகள் கணக்கெடுப்பு பணி செப்டம்பர் 2026 வரை நடைபெற உள்ளது. இந்த கணக்கெடுப்பை சமூக மறுவாழ்வு பணியாளர்கள் (Community Rehabilitation Worker - CRW) மற்றும் சமூக வழி நடத்துனர்கள் (Community Facilitator - CF) ஆகியோர் வீடு வீடாக சென்று மேற்கொள்வர்.




மாவட்ட ஆட்சித்தலைவர் பவன் குமார் இது குறித்து வெளியிட்ட அறிக்கையில், மாற்றுத்திறனாளிகள் இல்லாத குடும்பங்களில் விவரங்களை பதிவு செய்ய குடும்ப அட்டையை மட்டும் வழங்கினால் போதுமானது என்று தெரிவித்தார். ஆனால், தங்களது இல்லங்களில் மாற்றுத்திறனாளிகள் இருப்பின், அடையாள அட்டை வைத்துள்ளவர்கள் அவர்களது முழு விவரங்களையும் கணக்கெடுப்பாளர்களிடம் வழங்கி பதிவு செய்து கொள்ள வேண்டும்.




மாற்றுத்திறனாளிகள் அடையாள அட்டை இல்லாதவர்கள் மற்றும் புதிதாக கண்டறியப்படும் அனைத்து மாற்றுத்திறனாளிகளும் தங்களுடைய விவரங்களை எந்த வித தயக்கமும் இன்றி களப்பணியாளர்களிடம் முழுமையாக வழங்க வேண்டும் என்றும் ஆட்சித்தலைவர் வலியுறுத்தினார். இந்த சமூக தரவுகள் கணக்கெடுப்பிற்கு மக்கள் முழு ஒத்துழைப்பு வழங்கிட வேண்டும் என்றும் அவர் கேட்டுக்கொண்டார்.




இந்த கணக்கெடுப்பின் நோக்கம் மாவட்டத்தில் உள்ள அனைத்து மாற்றுத்திறனாளிகளையும் கண்டறிந்து, அவர்களுக்கு தேவையான அரசு திட்டங்கள் மற்றும் நலத்திட்டங்களை வழங்குவதற்கான வழிவகை செய்வதாகும். இதன் மூலம் மாற்றுத்திறனாளிகளின் சமூக மறுவாழ்வு மற்றும் நலனுக்கான திட்டங்கள் மேம்படுத்தப்படும்.




இது குறித்த கூடுதல் விவரங்களுக்கு மாவட்ட மாற்றுத்திறனாளிகள் அலுவலகத்தை 0422-2380381 மற்றும் 9499933471 என்ற தொலைபேசி எண்களில் தொடர்பு கொள்ளலாம் என்று மாவட்ட ஆட்சித்தலைவர் பவன் குமார் தெரிவித்தார்.