வால்பாறையில் தொடர் மழை: 154 அடியை எட்டியது சோலையார் அணை

வால்பாறை: வால்பாறை சுற்றுவட்டாரப் பகுதிகளில் தொடர் மழை பெய்து வருவதால் அங்குள்ள சோலையார் அணை 154 அடியை எட்டியது.

கோவை மாவட்டம் வால்பாறையில் பரம்பிகுளம்-ஆழியார் திட்டத்தின் முக்கிய அணையாக உள்ளது சோலையார் அணை. இந்த அணையில் சேகரிக்கப்படும் நீர் மின் உற்பத்திக்குப்பின் பரம்பிகுளம் வழியாக ஆழியார் மற்றும் திருமூர்த்தி அணைக்கு கொண்டு செல்லப்பட்டு, கோவை, ஈரோடு மற்றும் திருப்பூர் மாவட்டத்தில் விவசாயம் மற்றும் குடிநீர் தேவையைப் பூர்த்தி செய்கிறது.



வால்பாறையில் கடந்த ஒரு மாத காலமாக தொடர்ந்து மழை பெய்து வருகிறது. இதன் காரணமாக அங்குள்ள ஆறுகள் சிற்றோடைகளில் வெள்ளப் பெருக்கு ஏற்பட்டு சோலையார் அணைக்கு நீர் வரத்து கணிசமாக அதிகரித்துள்ளது.

160 அடி உயரமுள்ள சோலையார் அணையில் கடந்த மாதம் 4 அடியே நீர் இருந்த நிலையில் தற்போது நீர் மட்டம் அதிகரித்துள்ளது. இன்று காலை நிலவரப்படி 154 அடியாக நீர் மட்டம் உயர்ந்துள்ளது.



மழை அளவு

மாவட்டத்தில் நேற்று பெய்த மழை அளவு பின்வருமாறு:-

வால்பாறை 26.மி.மீ., சின்னகல்லாரில் 27 மி,மீ., நீரார் அணை 23 மி.மீ., சோலையார் அணையில் 29 மி,மீ., மழை பதிவாகி உள்ளது. சூலூர் 2 மி.மீ., வேளாண் பல்கலை., 5.20 மி.மீ.,  பீளமேடு 0.80 மி.மீ., பொள்ளாச்சி 7 மி.மீ மழை பதிவாகியுள்ளது.