கேரளாவில் நிபா வைரஸ் தாக்குதலுக்கு உயிரிழந்தோரின் எண்ணிக்கை 16 ஆக உயர்வு

கேரளாவில் நிபா வைரஸ் பாதிப்பால் மேலும் 2 பேர் உயிரிழந்த நிலையில், பலி எண்ணிக்கை 16 ஆக உயர்ந்துள்ளது.

கேரள மாநிலம் மலப்புரம், கோழிக்கோடு மற்றும் வயநாடு உள்ளிட்ட மாவட்டங்களில் நிபா வைரஸ் காய்ச்சல் தீவிரமாகப் பரவி வருகிறது. இந்த காய்ச்சல் தொற்றுநோய் ஏற்பட்ட வவ்வால்கள் மூலம் பிற விலங்குகள் மற்றும் மனிதர்களுக்கு பரவுவதாக தெரிய வந்துள்ளது. இந்தக் காய்ச்சலுக்கு இதுவரை 14 பேர் உயிரிழந்துள்ளனர். மேலும், கேரளாவில் நிபா வைரஸ் பாதிப்பு காரணமாக பலர் மருத்துவ மனையில் சிகிச்சை பெற்று வருகின்றனர்.

இந்த நிலையில், கோழிக்கோடு மாவட்டத்தைச் சேர்ந்த மதுசூதனன் (55), முக்கம் பகுதியைச் சேர்ந்த அகில் (28) ஆகிய இரண்டு பேர் நிபா வைரஸ் பாதிப்பால் உயிரிழந்துள்ளதாக செய்திகள் வெளிவந்துள்ளன. இதன்மூலம், நிபா வைரஸ் பாதிப்பால் உயிரிழந்தோர் எண்ணிக்கை 16 ஆக அதிகரித்துள்ளது. மேலும், 9 பேர் நிபா வைரஸ் பாதிப்புக்குரிய சந்தேகத்துடன் மருத்துவமனையில் சிகிச்சை பெற்று வருகின்றனர்.