காவிரி விவகாரம்: மத்திய அரசு அலுவலகங்களுக்குப் பூட்டு போடும் போராட்டம் அறிவிப்பு

திருப்பூர்: காவிரி மேலாண்மை வாரியம் அமைக்காததைக் கண்டித்து மத்திய அரசு அலுவலகங்களுக்கு விரைவில் பூட்டு போடும் போராட்டம் நடத்தப்படும் என திருப்பூரில் தென் இந்திய பார்வர்டு பிளாக் கட்சி அறிவித்துள்ளது. 

திருப்பூர் குமரன் சிலை முன்பு தென் இந்திய பார்வர்ட் பிளாக் கட்சி சார்பில் மாவட்ட தலைவர் ஜெயபிரகாஷ் தலைமையில் காவிரி மேலாண்மை வாரியம் அமைக்காத மத்திய அரசைக் கண்டித்தும், நியுட்ரினோ திட்டத்தை கைவிடக் கோரியும் கண்டன ஆர்ப்பாட்டம் நடைபெற்றது. இந்த ஆர்ப்பாட்டத்தில் கலந்து கொண்டவர்கள் மத்திய, மாநில அரசுகளுக்கு எதிரான கோஷங்களை எழுப்பினர்.



ஆர்ப்பாட்டத்தில் ஈடுபட்ட போது, தென் இந்திய பார்வர்டு பிளாக் கட்சியின் மாநில பொது செயலாளர் சங்கிலி செய்தியாளர்களிடம் பேசினார். அப்போது, அவர் பேசுகையில், "நியூட்ரினோ திட்டத்தைக் கைவிட விட்டால் இளைஞர்கள் ஒன்று திரண்டு வெடிகுண்டுகளை கட்டிக் கொண்டு அந்தத் திட்டத்தை தகர்ப்போம். காவிரி மேலாண்மை வாரியம் அமைக்காததால், மத்திய அரசு அலுவலகங்களுக்கு விரைவில் பூட்டு போட்டு போராட்டம் நடத்த உள்ளோம்." எனக் கூறினார்.



இந்த ஆர்ப்பாட்டத்தில் மதுரை மாவட்ட பொது செயலாளர் பாண்டியராஜன், திண்டுக்கல் மாவட்ட செயலாளர் செல்வம், திருப்பூர் மாவட்ட பொது செயலாளர் முத்து உள்பட ஏராளமானோர் கலந்து கொண்டனர்.