விவசாயிகளுக்கு லாபப் பயிராக மாறிய குருமிளகு

நீலகிரி: நீலகிரி மாவட்டத்தில் தேயிலை விலை வீழ்ச்சியடைந்த நிலையில், விவசாயிகளுக்கு லாபத்தைத் தரும் குருமிளகை பயிரிட்டுள்ளனர். 

குன்னூர், கூடலூர் மற்றும் பந்தலூர் தாலுகாக்களில் அதிகளவு பயிரிடப்படும் தேயிலைக்கு விலை வீழ்ச்சி ஏற்பட்டுள்ளது. இதனால், தேயிலை செடிகளை நீக்கி விட்டு விவசாயிகள் காபி விவசாயத்துக்கு மாறியுள்ளனர். மேலும், கூடலூர் பகுதியில் தேயிலை, காபி, ஏலம், குருமிளகு, பாக்கு போன்ற நீண்ட காலப் பயிர்களை தவிர, குறுகிய கால பயன்தரும் காய்கறிகள், நெல் மற்றும் நேந்திர வாழை, இஞ்சி உற்பத்தியிலும் விவசாயிகள் ஆர்வத்துடன் ஈடுபட்டு வருகின்றனர். இப்பகுதியில், விளைவிக்கப்படும் பாகற்காய், பூசணி, பஜ்ஜிமிளகாய், இஞ்சி, நேந்திர வாழை ஆகியவை அதிகளவில் கேரள மாநிலத்துக்கு கொண்டு செல்லப்படுகிறது. இவற்றின், விலையின் ஏற்றத் தாழ்வு, கேரள சந்தையில் நிர்ணயம் செய்யப்படுகிறது. இவற்றில், குருமிளகு விவசாயிகளுக்கு அதிக லாபத்தை ஈட்டி தருகிறது. 

குருமிளகு மொத்த வியாபாரிகள் கூறும் போது, இந்தாண்டு காய்ந்த குருமிளகுக்கு விலை சரிந்துள்ளது. கிலோ ரூ. 850 முதல் ரூ.1,000 வரை விலை போன குருமிளகு விலை தற்போது ரூ. 450 ஆக சரிந்துள்ளது. இந்நிலையில், பச்சை குருமிளகின் விலை அதிகரித்துள்ளது. கிலோவுக்கு ரூ. 120 முதல் ரூ. 140 வரை விலை கிடைப்பதால் விவசாயிகள் தற்போது குருமிளகு அறுவடையில் ஈடுபட்டுள்ளனர்.