பிப்.,1 முதல் கோவை - மேட்டுப்பாளையம் இடையிலான ரயில்சேவையில் தற்காலிக மாற்றம்

கோவை, டிசம்பர் 20

ரயில்நிலைய விரிவாக்கப்பணிகள் காரணமாக கோவை - மேட்டுப்பாளையம் இடையிலான ரயில் சேவையில் பிப்ரவரி 1-ம்தேதி முதல் தற்காலிக மாற்றம் செய்யப்பட்டுள்ளது.

மேட்டுப்பாளையம் ரயில்நிலையத்தில் நடைமேடைகளின் நீளத்தை 23 ரயில்பெட்டிகள் நிற்கும் அளவுக்கு நீட்டிப்பது தொடர்பான பணிகளுக்காக அடுத்த ஆண்டு பிப்ரவரி 1-ம் தேதி முதல் மார்ச் 3-ம் தேதி வரையிலான 31 நாட்களுக்கு இயக்கப்படும் ரயில்களின் நேரத்தில் மாற்றம் செய்யப்பட்டுள்ளன.

ரயில்சேவையில் மேற்கொள்ளப்பட்டுள்ள மாறுதல்கள் பின்வருமாறு:

ரயில் எண். 12671/12672 சென்னை சென்ட்ரல் - மேட்டுப்பாளையம் இடையிலான நீலகிரி விரைவு ரயில், கோவை - மேட்டுப்பாளையம் இடையே ரத்து செய்யப்பட்டு, கோவையிலேயே நிறுத்தப்படுவதுடன் அங்கிருந்தே புறப்படும்.

ரயில் எண். 56145/56146, 56147/56148, 56149/56150, 56151/56144 கோவை - மேட்டுப்பாளையம் பயணிகள் ரயில், மேட்டுப்பாளையம் காரமடை இடையே ரத்து செய்யப்பட்டு, காரமடையில் நிறுத்தப்படுவதுடன் அங்கிருந்தே புறப்படும்.

பயணிகள் இந்த மாற்றங்களைக் கருத்தில் கொண்டு தங்கள் பயணத்தை திட்டமிட்டுக் கொள்ளுமாறு கேட்டுக்கொள்ளப்படுகிறார்கள்.