விளையாட்டு துறைகளில் சிறந்து விளங்கும் மாற்றுத்திறனாளிகளின் சாதனைகள வெளிப்படுத்தும் விதமாக, 12 மாற்றுத்திறனாளி விளையாட்டு வீரர்களின் புகைப்படங்கள் மற்றும் அவர்களின் சாதனைகளை விளக்கும் 'ஐம் ஸ்பெசல்' (I am Special) என்ற பெயரில் 2018-ம் ஆண்டுக்கான காலண்டர், கோவை சுவர்கா பவுண்டேஷனால் வெளியிடப்பட்டது.
இந்த காலண்டர் வெளியிட்டு விழா கோவை இஎஸ்ஐ மருத்துவமனை அருகே உள்ள தனியார் விடுதி ஒன்றில் நடைபெற்றது.
இந்தியா முழுவதிலும் பல்வேறு விளையாட்டுகளில் சாதனை படைத்து தனக்கென ஒரு பாதையை உருவாக்கி வரும் 12 விளையாட்டு வீரர்களின் புகைப்படங்கள் 'ஐம் ஸ்பெசல்' காலண்டரில் இடம் பெற்றுள்ளன.
சுவர்கா பவுண்டேசன் அறக்கட்டளையின் நிர்வாக அறங்காவலர் சுவர்னலதா இறைவாழ்த்துடன் நிகழ்ச்சியை தொடங்கி வைத்தார். தொடர்ந்து அவர் பேசுகையில், 'மாற்றுத்திறனாளிகளான ஒவ்வொருவரும் பிறரிடமிருந்து அனுதாபங்களை எதிர்பார்ப்பதில்லை மாறாக, எங்கள் திறமைகளுக்கு ஆதரவை மட்டுமே எதிர்பார்த்து காத்திருக்கிறோம்.
நாங்கள் எப்படி இருக்கிறோம் என்பதை வைத்து எங்களை மதிப்பிடாமல் நாங்கள் யார்? என்பதனை வைத்து எங்களை மதிப்பிடுங்கள். இந்த காலண்டர் வெளீயீட்டு நிகழ்ச்சிக்கு வந்ததன் மூலமாக எங்களுக்கு ஆதரவு கொடுத்திருக்கும் அனைவருக்கும் நன்றி' என்றார்.
தொடர்ந்து, 'ஐம் ஸ்பெஷல்' காலண்டரில் இடம்பெற்றுள்ள மாற்றுத்திறனாளி விளையாட்டு வீரர்கள் காலண்டரை வெளியிட்டனர். இந்த நிகழ்ச்சியில் பல்வேறு மாநிலங்களை சேர்ந்த சமூக ஆர்வலர்கள், விளையாட்டு வீரர்கள் கலந்து கொண்டனர்.
