கோவை மத்திய சிறையில் கைதி பலி

கடந்த 2009-ம் ஆண்டு சூலூரில் நடந்த கொலை வழக்கில் கைது செய்யப்பட்டவர் ஆனந்த் (49). இவருக்கு ஆயுள் தண்டனை விதிக்கப்பட்டு கோவை மத்திய சிறையில் அடைக்கப்பட்டிருந்தார்.

இந்த நிலையில், சிறை வளாகத்தில் பணி செய்து கொண்டிருந்த ஆனந்த் நேற்று மாலை திடீரென மயங்கி விழுந்தார். இதையடுத்து, சிறைக்காவலர்கள் ஆனந்தை மீட்டு கோவை அரசு மருத்துவமனைக்கு அழைத்துச் சென்றனர். அங்கு, ஆனந்தை பரிசோதித்த மருத்துவர்கள் அவர் வரும் வழியிலேயே இறந்து விட்டதாக தெரிவித்தனர். மேலும், அவர் மாரடைப்பால் மரணமடைந்திருக்கலாம் என்று கூறிய மருத்துவர்கள் ஆனந்தின் உடலை பிரேத பரிசோதனைக்காக அனுப்பினர்.

இது தொடர்பாக, சிறை அதிகாரிகள் கொடுத்த புகாரின் பேரில் ரேஸ்கோர்ஸ் போலீசார் வழக்குப்பதிவு செய்துள்ளனர்.