கே.எம்.சி.எச் மருத்துவமனையில் மூளைச்சாவடைந்த 22 வயதுடைய இளம் வணிக ஆய்வாளர் 6 பேருக்கு மறுவாழ்வு அளித்தார்

கேரளா மாநிலம், பாலக்காடு மாவட்டம், ஓட்டப்பாலம், சுனங்காட் அஞ்சலை சேர்ந்த நவநீத் (22), இவர் பெங்களூரில் உள்ள தனியார் நிறுவனத்தில் வணிக ஆய்வாளராக பணியாற்றிவருகிறார். இவர் விடுமுறைக்காக கடந்த 15-ஆம் தேதி பெங்களூரில் இருந்து பாலக்காட்டுக்கு அவரது வேலையை முடித்து விட்டு இரு சக்கர வாகனத்தில் சென்றுகொண்டு இருக்கும்பொழுது தர்மபுரி அருகே சாலையை கடந்த இரு சக்கர வாகனம் ஒன்று அவர் மீது மோதியதில் தூக்கி வீசப்பட்டார்.

இதில் நவநீத் தலையில் பலத்த காயம் ஏற்பட்டது. உடனடியாக கே.எம்.சி.எச் மருத்துவமனைக்கு கொண்டு செல்லப்பட்டார். அங்கு அவருக்கு தீவிர சிகிச்சை அளிக்கப்பட்டது. இருந்தபோதிலும் அவரது உடல் நிலையில் எந்த வித முன்னேற்றமும் ஏற்படவில்லை.

இந்த நிலையில் கடந்த 16-ஆம் தேதி அவருக்கு மூளைச் சாவு ஏற்பட்டது. அதனைத் தொடர்ந்து அவரது தந்தை சங்கரநாராயணன், அவரது மகன் நவநீத் உடல் உறுப்புகளை தானம் செய்ய முன் வந்தார்.

அவரது இருதயம், கல்லீரல், சிறுநீரகங்கள் மற்றும் கண்கள் ஆகியவை தானமாக பெறப்பட்டு, கல்லீரல் மற்றும் சிறுநீரகங்கள்  கே.எம்.சி.எச் மருத்துவமனைக்கும், இருதயம் சென்னையில் உள்ள தனியார் மருத்துவமனைக்கும் மற்றும் கண்கள் அரவிந்த்  மருத்துவமனைக்கும் வழங்கப்பட்டது.

இது குறித்து கே.எம்.சி.எச் மருத்துவமனை தலைவர் நல்ல ஜி.பழனிசாமி கூறுகையில், மக்களிடையே உடல் உறுப்பு தானம் குறித்து அதிக விழிப்புணர்வு தேவைப்படுகிறது. ஒருவர் இறந்த பிறகு அவரது உடல் உறுப்புகள் தானமாக வழங்கப்பட்டால் அது பலரது உயிரைக் காப்பாற்ற உதவும். பின்னர் உடல் உறுப்பு தானம் வழங்கிய நவநீத் குடும்பத்திற்கு எனது நன்றியை தெரிவித்துக் கொள்கிறேன் என்று கூறினார்.