கோவை புதூர் பகுதியில் வீட்டின் பூட்டை உடைத்து 14 பவுன் நகைகள் கொள்ளை

Coimbatore: கோவை புதூர் காமாட்சி நகரில் வீட்டின் பூட்டை உடைத்து 14 பவுன் தங்க நகைகள் கொள்ளையடிக்கப்பட்ட சம்பவம் அதிர்ச்சியை ஏற்படுத்தியுள்ளது.

கோவை புதூர் காமாட்சி நகரை சேர்ந்தவர் குருமூர்த்தி. இவரது மனைவி கீதா (72). கீதா கடந்த ஜூலை 22ஆம் தேதி வீட்டை பூட்டி விட்டு திருவனந்தபுரத்தில் உள்ள தனது உறவினர் வீட்டுக்கு சென்றிருந்தார்.

இந்நிலையில், ஜூலை 24 மாலை கீதாவின் வீட்டின் முன் கதவு பூட்டு உடைக்கப்பட்டிருப்பதை வேலைக்காரப் பெண் முத்துலட்சுமி கண்டுபிடித்தார். உடனடியாக அவர் கீதாவுக்கு தகவல் தெரிவித்தார். பின்னர் வீட்டை சோதித்தபோது, பீரோவில் வைக்கப்பட்டிருந்த 14 பவுன் தங்க நகைகள் காணாமல் போயிருந்தது தெரியவந்தது.

இதுகுறித்து கீதா குனியமுத்தூர் காவல் நிலையத்தில் புகார் அளித்தார். புகாரின் அடிப்படையில், போலீஸ் இன்ஸ்பெக்டர் மணிவண்ணன் வழக்குப் பதிவு செய்து விசாரணையை மேற்கொண்டு வருகிறார்.

இந்த கொள்ளை சம்பவம் அப்பகுதி மக்களிடையே பெரும் அச்சத்தை ஏற்படுத்தியுள்ளது. வீட்டை பூட்டி விட்டு வெளியூர் செல்லும்போது எச்சரிக்கையாக இருக்க வேண்டும் என்றும், பாதுகாப்பு ஏற்பாடுகளை மேம்படுத்த வேண்டும் என்றும் போலீசார் அறிவுறுத்தியுள்ளனர்.