கோவை மாவட்ட அணைகளின் நீர்மட்டம் உயர்வு

Coimbatore: கோவை மாவட்டத்தில் தென்மேற்கு பருவமழை தொடர்ந்து பெய்து வருவதால் முக்கிய அணைகளின் நீர்மட்டம் கணிசமாக உயர்ந்து வருகிறது. ஜூன் 26ஆம் தேதி நிலவரப்படி மூன்று முக்கிய அணைகளான ஆழியாறு, பரம்பிக்குளம், சோலையாறு அணைகளின் நீர்மட்ட விவரங்களை நீர்வளத்துறை அதிகாரிகள் வெளியிட்டுள்ளனர்.



ஆனைமலையை அடுத்த ஆழியாறு அணை 120 அடி முழு கொள்ளளவு கொண்டது. அணையின் நீர்ப்பிடிப்பு பகுதிகளில் பெய்த மழையின் நீர் வரத்தால் தற்போது 58.4 அடியாக நீர்மட்டம் உள்ளது. அணைக்கு வினாடிக்கு 150 கன அடி நீர்வரத்து கிடைத்து வருகிறது. அதேநேரத்தில், அணையில் இருந்து வினாடிக்கு 350 கன அடி நீர் வெளியேற்றப்பட்டு வருகிறது.



பொள்ளாச்சியை அடுத்த பரம்பிக்குளம் அணை 72 அடி கொள்ளளவு கொண்டது. தென்மேற்கு பருவமழை காரணமாக அணையின் நீர்ப்பிடிப்பு பகுதிகளில் இருந்து தொடர்ந்து நீர்வரத்து கிடைத்து வருகிறது. இதனால் இன்றைய நிலவரப்படி 16.14 அடியாக நீர்மட்டம் உயர்ந்துள்ளது. அணைக்கு வினாடிக்கு 30 கன அடி நீர்வரத்து கிடைக்கிறது. அணையில் இருந்து வினாடிக்கு 495 கன அடி நீர் வெளியேற்றப்பட்டு வருகிறது.



வால்பாறையில் அமைந்துள்ள சோலையாறு அணை 160 அடி கொள்ளளவு கொண்டது. அணையின் நீர்ப்பிடிப்பு பகுதிகளில் பெய்த மழையின் நீர் வரத்தால் இன்று 69.23 அடியாக நீர்மட்டம் உள்ளது. அணைக்கு வினாடிக்கு 172 கன அடி நீர்வரத்து கிடைத்து வருகிறது. அணையில் இருந்து வினாடிக்கு 5 கன அடி நீர் வெளியேற்றப்படுகிறது.

தென்மேற்கு பருவமழை தொடர்ந்து சீராக பெய்து வருவதால், அணைகளின் நீர்மட்டம் படிப்படியாக உயர்ந்து வருவதாக நீர்வளத்துறை அதிகாரிகள் தெரிவித்துள்ளனர். விவசாயிகளுக்கு போதுமான நீர்ப்பாசன வசதி கிடைக்கும் என எதிர்பார்க்கப்படுகிறது.