கோவை: தமிழ்நாடு வேளாண்மை பல்கலைக்கழகத்தில் இளமறிவியல் பட்டப்படிப்புக்கான தரவரிசை பட்டியல் இன்று வெளியிடப்பட்டது.
கோவை: தமிழ்நாடு வேளாண்மை பல்கலைக்கழகத்தில் இளமறிவியல் பட்டப்படிப்புக்கான தரவரிசை பட்டியல் இன்று வெளியிடப்பட்டது.
இதில் திண்டுக்கல் மாவட்டத்தைச் சேர்ந்த எஸ்.என் ஆர்த்தி, 200க்கு 200 கட் ஆப் மதிப்பெண் பெற்று முதலிடம் பிடித்தார். கொடுமுடி பகுதியை சார்ந்த ஸ்ரீ கார்திகா பழனிச்சாமி 199.67 கட் ஆப் மதிப்பெண் பெற்று இரண்டாம் இடத்தை பிடித்தார். கோவையை சார்ந்த எம். மோகனா 199.5 கட் ஆப் மதிப்பெண் பெற்று மூன்றாம் இடத்தை பிடித்தார்.
இது குறித்து தமிழ்நாடு வேளாண்மை பல்கலைக்கழகத்தில் துணை வேந்தர் கே.ராமசாமி கூறுகையில், "வரும் ஜூலை மாதம் 7-ம் தேதி சிறப்பு ஒதுக்கீடுகளுக்கான கலந்தாய்வு நடைபெறும். இணையதளம் மூலமாக மட்டுமே கலந்தாய்வு நடைபெறுவதால் கோவைக்கு யாரும் வரவேண்டிய அவசியம் இல்லை.
முதல் முறையாக இணையதள வழியாக வரும் ஜூலை 9 முதல் 13-ம் தேதி வரை முதல் கட்ட கலந்தாய்வு நடைபெறுகிறது. அதே மாதம் 23-ம் முதல் 27 வரை இரண்டாம் கட்ட கலந்தாய்வு நடைபெறும்.
தொழில் கல்விக்கான கலந்தாய்வு 16-ல் நடைபெறும். அதே போல் வெளிநாடு வாழ் இந்தியர்களுக்கான மற்றும் நிறுவனங்களுக்கான கலந்தாய்வு 17 மற்றும் 18 ஆகிய தேதிகளில் நடைபெறும். ஆகஸ்டு மாதம் முதல் நாள் கல்லூரி தொடங்குகிறது. அதே மாதம் 31-ம் தேதியோடு மாணவர் சேர்க்கை முடிவடையும்.
இணையதள வழியாக நடைபெறும் கலந்தாய்வில் சிலைடிங் (Sliding) முறை அறிமுகப்படுத்தவுள்ளது. இதனால் மாணவர்கள் கலந்தாய்வில் இடங்கள் இருந்தால் தங்கள் விருப்பப்படி மாற்றிக்கொள்ளலாம்.
இந்த தரவரிசை பட்டியலில் 197 என்ற கட் ஆப் மதிப்பெண்ணை 100 பேர் பெற்றுள்ளனர். 195.75 கட் ஆப் 200 பேர் பெற்றுள்ளனர். 195 கட் ஆப் 300 பேர் பெற்றுள்ளனர். கலந்தாய்வின் படி மாணவர்களுக்கு அரசு கல்லூரியிலேயே இடம் கிடைக்கும். மாணவர்களுக்கு அவர்களது பெற்றோர் எந்த விதத்திலும் நெருக்கடி கொடுக்க வேண்டாம்." என்றார்.
48,676 மாணவர்கள் விண்ணப்பித்த நிலையில் 32,621 பேர் முழுமையாக விண்ணப்பங்களை பூர்த்தி செய்துள்ளனர். அவர்கள் கலந்தாய்வில் கலந்து கொள்வார்கள் என எதிர்பார்க்கப்படுகிறது. இதில் ஆண்கள் 13,889 , பெண்கள் 18,732 என்பது குறிப்பிடத்தக்கது.
