ஆவினில் கோடை கால மோர் மற்றும் தயிர் அறிமுகம்

கோவை: கோவையில் உள்ள ஆவின் நிலையங்களில், கோடை கால மோர் மற்றும் தயிர் இன்று அறிமுகம் செய்யப்பட்டுள்ளது.



ஆர்.எஸ். புரத்தில் அமைந்துள்ள ஆவின் அலுவலகத்தில், புதிதாக அறிமுகம் செய்யப்பட்டுள்ள கோடை கால மோர் மற்றும் தயிர் பாக்கெட்டுகளின் விற்பனையை ஆவின் பொதுமேலாளர் எஸ். செல்வராஜ் தொடங்கி வைத்தார்.



பின்னர், அவர் கூறியதாவது, 'கோடை கால வெயிலால் ஏற்படும் தாகத்தை தணிக்க, கோடை கால மோர் மற்றும் தயிர் பாக்கெட்டுகளை இந்த ஆண்டு அறிமுகம் செய்துள்ளோம். மிகக் குறைவான விலையில், இவை விற்கப்பட்டாலும், தரத்தில் மற்ற தயாரிப்புகளை விட சிறந்தவையாகும். நகரில் உள்ள அனைத்து ஆவின் விற்பனை நிலையங்களிலும், இந்த மோர் மற்றும் தயிர் பாக்கெட்டுகளை பொதுமக்கள் வாங்கலாம். மேலும், சிறப்பான விலையில் அறிமுகம் செய்யப்பட்டுள்ள 1/2 லிட்டர் தயிர் பாக்கெட்டுகள், வருடம் முழுவதும் ஆவின் நிலையங்களில் கிடைக்கும், 200 மி.லி மோர் பாக்கெட் விற்பனை, வாடிக்கையாளர்களின் தேவையை பொறுத்து தொடரப்படும்' என்றார்.

200 மி.லி. மோர் பாக்கெட் ரூ.7-க்கும், 1/2 லிட்டர் தயிர் பாக்கெட் ரூ. 27-க்கும் விற்பனை செய்யப்படுகிறது. மொத்தமாக வாங்கும் வாடிக்கையாளர்களுக்கு, மோர் பாக்கெட் ரூ.5-க்கும், தயிர் பாக்கெட் ரூ. 22-க்கும் விற்கப்படும் என அறிவிக்கப்பட்டுள்ளது.