News
கோவையைச் சேர்ந்த காணாமல் போன 70 வயது மூதாட்டி மேட்டுப்பாளையம் போலீசாரால் மீட்பு
SimpliCity News Team · 3 days ago

Coimbatore: கோவை மாவட்டம் ஆர்.எஸ்.புரம் பகுதியைச் சேர்ந்த 70 வயது மூதாட்டி ஒருவர், காணாமல் போன இரண்டு நாட்களுக்குள் மேட்டுப்பாளையம் காவல்துறையினரால் பத்திரமாக மீட்கப்பட்டு, அவரது மகனிடம் ஒப்படைக்கப்பட்டார்.
கடந்த 17.11.2026 அன்று மாலை, மூதாட்டி கடைக்குச் செல்வதாகக் கூறிவிட்டு வீட்டிலிருந்து சென்றவர் மீண்டும் வீடு திரும்பவில்லை. இதனால் கவலையடைந்த அவரது மகன், ஆர்.எஸ்.புரம் காவல் நிலையத்தில் வாய்மொழியாகப் புகார் அளித்திருந்தார்.
இந்நிலையில், அன்று இரவு மேட்டுப்பாளையம் பேருந்து நிலையத்தில் மூதாட்டி ஒருவர் தனியாக அமர்ந்திருப்பதைக் கண்ட இரவு ரோந்துப் பணியில் ஈடுபட்டிருந்த சிறப்பு உதவி ஆய்வாளர் ஆறுமுகம் மற்றும் தலைமை காவலர் மனோஜ் ஆகியோர் அவரிடம் விசாரணை மேற்கொண்டனர்.
விசாரணையில், அவர் கோவை ஆர்.எஸ்.புரம் பகுதியைச் சேர்ந்தவர் என்பதும், சற்று மனநலம் பாதிக்கப்பட்டவர் என்பதும் தெரியவந்தது. இதனைத் தொடர்ந்து ஆர்.எஸ்.புரம் காவல் நிலையத்தைத் தொடர்புகொண்டு விசாரித்ததில், மூதாட்டி காணாமல் போனது தொடர்பாக அவரது மகன் புகார் அளித்திருந்தது உறுதி செய்யப்பட்டது.
உடனடியாக அவரது மகனுக்குத் தகவல் தெரிவிக்கப்பட்டு, மேட்டுப்பாளையம் பேருந்து நிலையத்திற்கு வரவழைக்கப்பட்டார். பின்னர், 70 வயது மூதாட்டி அவரது மகனிடம் பாதுகாப்பாக ஒப்படைக்கப்பட்டார்.
மேட்டுப்பாளையம் காவல்துறையினரின் இந்தச் செயலை கோவை மாவட்ட காவல் கண்காணிப்பாளர் வெகுவாக பாராட்டினார்.