News
கோவை காளப்பட்டியில் கிடைத்த பணப்பையை திருப்பிக் கொடுத்த மாணவிக்கு 2 கிராம் தங்க மோதிரம் பரிசு
SimpliCity News Team · 3 days ago

Coimbatore: காளப்பட்டி சாலையில் கிடைத்த மணி பர்ஸை உரியவரிடம் ஒப்படைத்த பள்ளி மாணவி சுபிக்ஷாவுக்கு, அப்பணப்பையின் உரிமையாளர் மோகன்ராஜ் 2 கிராம் தங்க மோதிரத்தைப் பரிசாக வழங்கி நன்றி தெரிவித்துள்ளார்.
கடந்த 16ஆம் தேதி காளப்பட்டி சாலையில் சென்றுகொண்டிருந்தபோது, சாலையில் மணி பர்ஸ் ஒன்று கிடப்பதைக் கண்டெடுத்துள்ளார் சுபிக்ஷா. அதனைத் திறந்து பார்த்தபோது, அதில் ஆதார் அட்டை, ஏடிஎம் அட்டை மற்றும் ரூ.10,800 ரொக்கப் பணம் இருந்துள்ளது.
மணி பர்ஸை உரியவரிடம் ஒப்படைக்க வேண்டும் என்ற நோக்கில், சுபிக்ஷா இதுகுறித்து தனது தந்தை விஸ்வநாதனிடம் தெரிவித்துள்ளார். இதையடுத்து, விஸ்வநாதன் மணி பர்ஸ் கிடைத்த விவரத்தைத் தனது வாட்ஸ்அப் குழுக்களில் பகிர்ந்துள்ளார். இந்தத் தகவல் அடுத்தடுத்து பல்வேறு குழுக்களுக்கும் பகிரப்பட்ட நிலையில், மணி பர்ஸைத் தவறவிட்ட அதன் உரிமையாளர் மோகன்ராஜுக்கு தகவல் கிடைத்துள்ளது.
இதையடுத்து, மாணவியின் குடும்பத்தினரைத் தொடர்புகொண்ட மோகன்ராஜ், மணி பர்ஸ் பாதுகாப்பாக இருப்பதை அறிந்துள்ளார். மேலும், அதனை உரியவரிடம் சேர்க்க முன்வந்த மாணவியின் நேர்மையைப் பாராட்ட விரும்பியுள்ளார்.
அதன்படி, மாணவியின் வீட்டிற்கே நேரில் சென்ற மோகன்ராஜ், சுபிக்ஷாவுக்கு 2 கிராம் தங்க மோதிரத்தைப் பரிசாக வழங்கி தனது நன்றியையும் பாராட்டையும் தெரிவித்துள்ளார்.
கீழே கிடந்த பணத்தையும் ஆவணங்களையும் தனதாக்கிக் கொள்ளாமல், அவற்றை உரியவரிடம் சேர்க்க வேண்டும் என்ற எண்ணத்துடன் செயல்பட்ட பள்ளி மாணவியின் நேர்மைக்கு கிடைத்த இந்தப் பரிசு, அப்பகுதி மக்களிடையே பாராட்டைப் பெற்றுள்ளது.