News
கோவையில் தங்க நகைக் கடை கொள்ளை வழக்கு: மூவருக்கும் தலா 7 ஆண்டுகள் சிறை தண்டனை
SimpliCity News Team · 4 days ago

Coimbatore: கோவை ராஜ வீதியில் உள்ள தங்க நகைக் கடையில் நடந்த 4.250 கிலோ தங்கம் கொள்ளை வழக்கில் மூன்று குற்றவாளிகளுக்கும் கோவை கூடுதல் அமர்வு நீதிமன்றம் தலா 7 ஆண்டுகள் சிறைத் தண்டனை விதித்துத் தீர்ப்பளித்துள்ளது.
கடந்த 02.03.2017 அன்று பிற்பகல் சுமார் 03.50 மணியளவில், கோவை ராஜ வீதியில் உள்ள ஜனனி காம்ப்ளக்ஸில் செயல்பட்டு வந்த சித்தி கோல்டு இந்தியா பிரைவேட் லிமிடெட் தங்க நகைக் கடைக்குள், அக்கடையில் கார் ஓட்டுநராகப் பணிபுரிந்து வந்த ரியாசுதீன் மற்றும் அவருடன் வந்த மேலும் இருவர் நுழைந்தனர். அவர்கள் அக்கடையில் பணிபுரிந்த பெண் ஊழியர்களை அரிவாளைக் காட்டி மிரட்டி, கொலை மிரட்டல் விடுத்து, கடையிலிருந்த சுமார் 4 கிலோ தங்கக் கட்டிகள் மற்றும் 250 கிராம் தங்க நகைகள் என மொத்தம் 4.250 கிலோ தங்கத்தையும், மேலும் கடையிலிருந்த DVR மற்றும் TN 37 V 5271 என்ற பதிவு எண் கொண்ட பஜாஜ் கலிபர் இருசக்கர வாகனத்தையும் எடுத்துச் சென்றனர்.
இதுகுறித்து அளிக்கப்பட்ட புகாரின் அடிப்படையில், கோவை மாநகர B3 VH Road குற்றப்பிரிவு காவல் நிலையத்தில் குற்ற எண் 236/2017-ன் கீழ் IPC 392 மற்றும் 397-ன் படி வழக்குப் பதிவு செய்யப்பட்டது. தொடர்ந்து, காவல்துறையினர் தீவிர புலன் விசாரணை மேற்கொண்டு குற்றவாளிகளைக் கண்டறிந்து, அவர்களுக்கு எதிரான சாட்சியங்கள் மற்றும் ஆதாரங்களைச் சேகரித்து நீதிமன்றத்தில் வழக்கைத் தொடர்ந்து நடத்தினர்.
குற்றவாளிகள் விவரம்: ரியாசுதீன் (35), த/பெ.முஸ்தபா, தெற்கு உக்கடம், கோவை; அசாருதீன் (35), த/பெ. பரீத் பாபு, வடவள்ளி, கோவை; விஜயகுமார் (32), த/பெ. பொன்னுசாமி, இடையர்பாளையம், கோவை.
இவ்வழக்கை விசாரித்த கோவை கூடுதல் அமர்வு நீதிமன்றம், மூன்று நபர்களும் குற்றவாளிகள் எனத் தீர்மானித்து, ஒவ்வொருவருக்கும் இந்திய தண்டனைச் சட்டம் பிரிவு 397-ன் கீழ் 2 ஆண்டுகள் சிறைத் தண்டனை மற்றும் ரூ.2,000 அபராதமும், இந்திய தண்டனைச் சட்டம் பிரிவு 392-ன் கீழ் 7 ஆண்டுகள் சிறைத் தண்டனை மற்றும் ரூ.5,000 அபராதமும் விதித்து தீர்ப்பளித்தது.
இவ்வழக்கில் சிறப்பான முறையில் புலன் விசாரணை மேற்கொண்டு, குற்றவாளிகளுக்கு எதிரான உரிய ஆதாரங்களைச் சேகரித்து, வழக்கு நீதிமன்றத்தில் முறையாக நிரூபிக்கப் பணியாற்றிய காவல் ஆய்வாளர் ஓ. ஆனந்த் அவர்களையும், வழக்கின் சாட்சிகளை முறையாக ஒருங்கிணைத்து, உரிய காலங்களில் நீதிமன்றத்தில் ஆஜர்படுத்தி, வழக்கு விசாரணை சிறப்பாக நடைபெறுவதற்கு உறுதுணையாகப் பணியாற்றிய தற்போதைய காவல் ஆய்வாளர் தங்கம் மற்றும் தலைமைக்காவலர் புவனேஸ்வரி (காவல் எண் 1156) அவர்களையும் உயர் அதிகாரிகள் வெகுவாகப் பாராட்டினர்.
கோவை மாநகரில் குற்றச் செயல்களில் ஈடுபடும் நபர்கள் மீது சட்டப்படி தொடர்ந்து கடுமையான நடவடிக்கைகள் மேற்கொள்ளப்படும். குற்றங்களில் ஈடுபடுவோர் கண்டறியப்பட்டு, உரிய ஆதாரங்களுடன் நீதிமன்றத்தில் ஆஜர்படுத்தப்பட்டு, சட்டப்படி தண்டனை பெற்றுத் தர கோவை மாநகர காவல்துறை தொடர்ந்து நடவடிக்கை மேற்கொள்ளும்.
