News
கோவை ஹோப்ஸ்–தண்ணீர் பந்தல் பகுதியில் உள்ள டாஸ்மாக் கடையை அகற்றக் கோரி பொதுமக்கள் ஆர்பாட்டம்
SimpliCity News Team · 4 days ago

Coimbatore: கோவை ஹோப்ஸ் பகுதியில் உள்ள தண்ணீர் பந்தல் சாலையில் செயல்பட்டு வரும் டாஸ்மாக் கடையை அகற்ற கோரி, அப்பகுதி பொதுமக்கள் அந்த கடையை முற்றுகையிட்டு ஆர்ப்பாட்டத்தில் ஈடுபட்டனர்.
கோவை ஹோப்ஸ் கல்லூரி அடுத்த தண்ணீர் பந்தல் பகுதி மற்றும் அதை அடுத்துள்ள அன்னம்மா நகர், லட்சுமி நகர் உள்ளிட்ட குடியிருப்பு பகுதிகளில் சுமார் 1000-க்கும் மேற்பட்ட குடும்பத்தினர் வசித்து வருகின்றனர். கோவை மாநகரின் அடையாளமாக திகழும் டைடல் பார்க் எனும் ஐடி நிறுவனங்களும் இதே பகுதியில் அமைந்துள்ளன. இங்கு சுமார் 10 ஆயிரத்திற்கும் மேற்பட்ட ஆண்கள், பெண்கள் பணியாற்றி வருகின்றனர். இவர்கள் இந்த பகுதியில் உள்ள விடுதிகளில் தங்கி பணிக்கு செல்கின்றனர்.
இந்த பகுதியில் கடந்த 10 ஆண்டுகளாக டாஸ்மாக் கடை எண் 1519 செயல்பட்டு வருகிறது. இந்த கடைக்கு வரும் மதுப்பிரியர்கள், பகுதி மக்களுக்கு பல்வேறு இடையூறுகளை ஏற்படுத்தி வருவதாக பொதுமக்கள் குற்றம்சாட்டுகின்றனர். மது போதையில் அதே பகுதியில் சிறுநீர் கழிப்பதாகவும், இதனால் பெண்கள் அந்த சாலையில் செல்ல முடியாத நிலை ஏற்படுவதாகவும் தெரிவிக்கின்றனர். மேலும் வாகனங்களை இதே பகுதியில் நிறுத்தி வாகன போக்குவரத்து இடையூறுகளையும் ஏற்படுத்தி வருகின்றனர்.
இந்த பிரச்சினையை தற்போது கையில் எடுக்க காரணமாக, இந்த பகுதியில் நீண்ட காலமாக கட்டப்படாமல் இருந்த மேம்பாலம் தற்போது கட்டப்பட்டு வருகிறது. இதனால் இந்த பகுதிக்கு செல்லும் இணைப்பு சாலை குறுகி வருகிறது. இந்த பாலம் திறக்கப்பட்டால் கூடுதல் பிரச்சினைகளை பொதுமக்கள் சந்திக்க நேரிடும் என்று கூறி, இன்று டாஸ்மாக் கடையை முற்றுகையிட்டு ஆர்ப்பாட்டம் நடத்தினர்.
நெடுஞ்சாலைத் துறை சார்பாக இந்த பகுதியில் இணைப்பு சாலை 16.5 அடி நீளத்திற்கு போடப்பட வேண்டும். ஆனால் அனைத்து கடைகளின் முன் பகுதிகளிலும் இந்த அளவுக்கு ஆக்கிரமிப்புகள் அகற்றப்பட்டுள்ள நிலையில், டாஸ்மாக் கடையின் ஆக்கிரமிப்பு மட்டும் அகற்றப்படாமல் உள்ளது என்று பொதுமக்கள் தெரிவித்தனர். எனவே நெடுஞ்சாலைத்துறையினர் முறையாக அளவீட்டின்படி சாலையை போட்டு பொதுமக்களுக்கு உதவிட வேண்டும் என்றும், இந்த டாஸ்மாக் கடையை இங்கிருந்து அப்புறப்படுத்தி பொதுமக்களுக்கு இடையூறு ஏற்படுத்தாத வண்ணம் இருக்க வேண்டும் என்றும் அந்த பகுதி மக்கள் ஆர்ப்பாட்டத்தில் ஈடுபட்டனர்.
இது சம்பந்தமாக தமிழக மதுவிலக்குக்துறை அமைச்சர் விக்னேஷை சந்தித்து மனு அளிக்க உள்ளதாகவும் அப்பகுதி பொதுமக்கள் தெரிவித்தனர்.

