News
"நீங்க திமுக ஏஜென்ட்" - துரை வைகோ பேச்சுக்கு கோவை பத்திரிகையாளர் மன்றம் கண்டனம்
SimpliCity News Team · 4 days ago

Coimbatore: கோவை விமான நிலையத்தில் செய்தியாளர்களைச் சந்தித்த மதிமுக முதன்மைச் செயலாளரும் நாடாளுமன்ற உறுப்பினருமான துரை வைகோ, கேள்வி எழுப்பிய மூத்த பத்திரிகையாளர் குருசாமியை திமுக ஏஜென்ட் எனக் குறிப்பிட்டு பேசியதால் சர்ச்சை எழுந்துள்ளது. இதுகுறித்து கோயம்புத்தூர் பத்திரிகையாளர் மன்றம் கடுமையான கண்டன அறிக்கை வெளியிட்டுள்ளது.
கோவை விமான நிலையத்தில் இன்று செய்தியாளர்களைச் சந்தித்த துரை வைகோ, திமுக, அதிமுக ஆட்சிக் காலங்களில் பழங்குடியினப் பெண்கள் கூட்டுப் பாலியல் வன்கொடுமைக்கு ஆளாக்கப்பட்டது உள்ளிட்ட பல்வேறு குற்றங்கள் நடைபெற்றதாகப் பேசினார். அப்போது மூத்த பத்திரிகையாளர் குருசாமி, "வாச்சாத்தி சம்பவம் நடைபெற்றபோது அமைச்சராக இருந்த செங்கோட்டையன், தற்போது தவெக அமைச்சராக இருக்கிறாரே?" என்று கேள்வி எழுப்பினார்.
இதற்குப் பதிலளிக்காமல், துரை வைகோ, "நீங்கள் திமுக ஏஜென்ட், திமுகவைச் சொன்னால் உங்களுக்கு ஏன் எரிகிறது? திமுகவுக்குப் பல்லக்குத் தூக்காதீர்கள்" என்று விமர்சித்ததாகக் கோயம்புத்தூர் பத்திரிகையாளர் மன்றம் தெரிவித்துள்ளது.
இதுகுறித்து மன்றம் வெளியிட்டுள்ள கண்டன அறிக்கையில், "நான் ஒரு பத்திரிகையாளராகத்தான் கேள்வி கேட்கிறேன். எந்தக் கட்சிக்கும் பல்லக்குத் தூக்க வேண்டிய அவசியமில்லை" என்று குருசாமி விளக்கமளித்த பிறகும், அவரை மீண்டும் திமுக ஏஜென்ட் என விமர்சித்திருப்பது அதிகார ஆணவத்தின் வெளிப்பாடாகும் என்று குறிப்பிடப்பட்டுள்ளது.
செய்தியாளர்கள் சந்திப்பு என்பது அரசியல் தலைவர்கள் தங்களுக்குச் சாதகமான கருத்துகளை மட்டும் பேசிவிட்டுச் செல்லும் மேடை அல்ல. செய்தியாளர்கள் கேள்வி எழுப்புவதும், முரண்பாடுகளைச் சுட்டிக்காட்டுவதும், விளக்கம் கேட்பதும் அவர்களது அடிப்படையான பத்திரிகைப் பணியாகும். கேள்விகளுக்குப் பதிலளிக்காமல், கேள்வி கேட்ட பத்திரிகையாளரை அரசியல் கட்சியின் ஏஜென்ட் என முத்திரை குத்துவது கண்டிக்கத்தக்கது என்றும் அறிக்கையில் தெரிவிக்கப்பட்டுள்ளது.
மேலும், "துரை வைகோ அவர்களே, நீங்கள் பேசுவதை மட்டுமே பத்திரிகையாளர்கள் கேட்டுக்கொண்டிருக்க வேண்டுமா? நீங்கள் முன்வைக்கும் கருத்துகளுக்கு எதிர்க்கேள்வி எழுப்பினால் அவர்கள் அரசியல் கட்சிகளின் ஏஜென்டுகளாகிவிடுவார்களா? கேள்விக்குப் பதில் இருந்தால் சொல்லுங்கள்; இல்லையென்றால் கடந்து செல்லுங்கள். கேள்வி கேட்ட பத்திரிகையாளரை அவமதிக்க உங்களுக்கு எந்த உரிமையும் இல்லை" என்று மன்றம் சுட்டிக்காட்டியுள்ளது.
பத்திரிகையாளர்கள் புகழ்பாடுவதற்கோ, அரசியல் கட்சிகளுக்குப் பல்லக்குத் தூக்குவதற்கோ வரவில்லை. மக்களின் சார்பாகக் கேள்வி கேட்கவே வருகின்றனர் என்றும், கருத்துச் சுதந்திரம், ஜனநாயகம், சமூகநீதி ஆகியவற்றைப் பேசும் அரசியல் இயக்கத்தின் முக்கியப் பொறுப்பில் இருப்பவர்கள், பத்திரிகையாளர்களின் சுயமரியாதையையும் தொழில்முறை கண்ணியத்தையும் மதிக்க வேண்டும் என்றும் வலியுறுத்தப்பட்டுள்ளது.
கேள்விக்குப் பதிலளிக்க முடியாத நிலை இருந்தால், பத்திரிகையாளர்களை இழிவுபடுத்தாமல் கடந்து செல்ல வேண்டும் என்றும், மூத்த பத்திரிகையாளர் குருசாமியை அவமதித்த தனது பேச்சுக்கு துரை வைகோ பகிரங்கமாக வருத்தம் தெரிவிக்க வேண்டும் என்றும் கோயம்புத்தூர் பத்திரிகையாளர் மன்றம் வலியுறுத்தியுள்ளது.