News
பாரதியார் பல்கலைக்கழகத்தில் ஆசிரியர்களுக்கான CAS பதவி உயர்வு நேர்முகத் தேர்வு – நவம்பர் 18 முதல் 20 வரை
SimpliCity News Team · 5 days ago

Coimbatore: பாரதியார் பல்கலைக்கழகத்தில் பணியாற்றும் ஆசிரியர்களின் நீண்டகாலப் பதவி உயர்வு நிலுவைகளுக்கு விரைவான தீர்வு காணும் நோக்கில், சுமார் 11 ஆண்டுகளுக்குப் பிறகு ஆசிரியர்களுக்கான பணி மேம்பாட்டு திட்டத்தின் (Career Advancement Scheme - CAS) கீழ் நேர்முகத் தேர்வு மற்றும் கலந்துரையாடல் நடைபெறவுள்ளது.
தமிழ்நாடு அரசின் உயர்கல்வித்துறை செயலாளரின் அறிவுறுத்தலின்படி, பல்கலைக்கழக மானியக் குழுவின் (UGC) விதிமுறைகளின்படி செயல்படுத்தப்படும் இந்தத் திட்டத்தின் கீழ், நவம்பர் 18, 19 மற்றும் 20 ஆகிய மூன்று நாட்களில் பாரதியார் பல்கலைக்கழக வளாகத்தில் இந்நிகழ்வு நடைபெறவுள்ளது.
பாரதியார் பல்கலைக்கழகத்தில் நீண்டகாலமாக நிலுவையில் இருந்த ஆசிரியர்களின் பதவி உயர்வு விண்ணப்பங்களைப் பரிசீலித்து, தகுதியான ஆசிரியர்களுக்கு உரிய பதவி உயர்வு வழங்குவதற்கான முக்கிய நடவடிக்கையாக இக்கூட்டங்கள் அமையவுள்ளன. பல்கலைக்கழக மானியக் குழு மற்றும் தமிழ்நாடு அரசின் உயர்கல்வித்துறையின் வழிகாட்டுதலின்படி, ஆசிரியர்களின் கல்வி மற்றும் ஆராய்ச்சிப் பணிகளுக்கு உரிய அங்கீகாரம் வழங்குவதுடன், பல்கலைக்கழகத்தின் கல்வித் தரத்தை மேலும் உயர்த்தும் நோக்கிலும் இந்நடவடிக்கை மேற்கொள்ளப்படுகிறது.
இந்த CAS பதவி உயர்வுக்காக பாரதியார் பல்கலைக்கழகத்தின் சுமார் 29 பல்கலைக்கழகத் துறைகளைச் சேர்ந்த 70-க்கும் மேற்பட்ட ஆசிரியர்கள் விண்ணப்பித்துள்ளனர். உதவிப் பேராசிரியர் நிலை-I முதல் நிலை-II, நிலை-II முதல் நிலை-III ஆகிய பல்வேறு நிலைகளுக்கான பதவி உயர்வு விண்ணப்பங்கள் இதில் அடங்கும்.
இதற்கான நேர்முகத் தேர்வு மற்றும் கலந்துரையாடல் கூட்டங்களுக்காக தமிழ்நாடு, கேரளா, கர்நாடகா, டெல்லி மற்றும் ஆந்திரப் பிரதேசம் உள்ளிட்ட மாநிலங்களைச் சேர்ந்த 29-க்கும் மேற்பட்ட மூத்த பேராசிரியர்கள், கல்வியாளர்கள் மற்றும் பாடவியல் வல்லுநர்கள் அழைக்கப்பட்டுள்ளனர். ஒவ்வொரு துறைக்கும் தொடர்புடைய பாடவியல் நிபுணர்களைக் கொண்டு, விண்ணப்பதாரர்களின் கல்வி, ஆராய்ச்சி மற்றும் பிற சாதனைகள் குறித்து UGC விதிமுறைகளின் அடிப்படையில் நேர்முகத் தேர்வு மற்றும் கலந்துரையாடல் கூட்டங்கள் நடைபெறவுள்ளன.
தற்போது நடைபெறவுள்ள மூன்று நாள் நேர்முகத் தேர்வு மற்றும் கலந்துரையாடல் கூட்டங்களில், விண்ணப்பதாரர்களின் கல்விசார் சாதனைகள், ஆராய்ச்சிப் பணிகள், கற்பித்தல் திறன், பாடவியல் அறிவு மற்றும் கல்வித்துறைக்கான பங்களிப்புகள் ஆகியவை நிபுணர் குழுவினரால் நேரடியாக மதிப்பீடு செய்யப்படவுள்ளன. ஒவ்வொரு விண்ணப்பதாரரின் தகுதியும் UGC மற்றும் பல்கலைக்கழக விதிமுறைகளுக்கு உட்பட்டு நியாயமான முறையில் பரிசீலிக்கப்பட உள்ளது.
இக்கூட்டங்கள் சிறப்பாக நடைபெறுவதற்காக பல்கலைக்கழக நிர்வாகத்தின் சார்பில் தேவையான அனைத்து ஏற்பாடுகளும் மேற்கொள்ளப்பட்டுள்ளன. வெளிமாநில நிபுணர்களின் பங்கேற்பு, துறைவாரியான ஒருங்கிணைப்பு மற்றும் நிர்வாக ஏற்பாடுகள் ஆகியவற்றின் மூலம் வெளிப்படையான மற்றும் தரமான மதிப்பீட்டு நடைமுறை உறுதி செய்யப்பட உள்ளது.
இந்த CAS நடவடிக்கை ஆசிரியர்களின் பணி சார்ந்த வளர்ச்சிக்கு மட்டுமல்லாமல், பல்கலைக்கழகத்தின் கல்வி மற்றும் ஆராய்ச்சித் தரத்தை மேம்படுத்துவதற்கும் முக்கியப் பங்காற்றும், ஆசிரியர்களின் நீண்டகாலக் கல்விசார் அர்ப்பணிப்பு, ஆராய்ச்சிச் சாதனைகள் மற்றும் மாணவர்களுக்கான பங்களிப்புகளை அங்கீகரிக்கும் ஒரு முக்கியமான நிகழ்வாக இது அமையும்.
பாரதியார் பல்கலைக்கழகம் உயர்கல்வி, ஆராய்ச்சி, புதுமை மற்றும் கல்வி நிர்வாகத்தில் தொடர்ந்து சிறந்து விளங்குவதற்கான பல்வேறு நடவடிக்கைகளை மேற்கொண்டு வருகிறது. பல்கலைக்கழக மானியக் குழு மற்றும் தமிழ்நாடு அரசின் உயர்கல்வித்துறையின் வழிகாட்டுதலின்படி நடைபெறும் இந்த CAS நேர்முகத் தேர்வு மற்றும் கலந்துரையாடல், பல்கலைக்கழகத்தின் கல்வி நிர்வாகத்தில் வெளிப்படைத்தன்மை, பொறுப்புணர்வு மற்றும் நல்லாட்சியை மேலும் வலுப்படுத்தும் முக்கிய நிகழ்வாக அமையும்.
மூன்று நாள் நேர்முகத் தேர்வு மற்றும் கலந்துரையாடல் கூட்டங்கள் நிறைவடைந்த பின்னர், நிபுணர் குழுவின் பரிந்துரைகள் மற்றும் பல்கலைக்கழக விதிமுறைகளின் அடிப்படையில் தகுதியான ஆசிரியர்களுக்கான பதவி உயர்வு தொடர்பான அடுத்தகட்ட நடவடிக்கைகள் மேற்கொள்ளப்படவுள்ளன. இதன் மூலம் பாரதியார் பல்கலைக்கழக ஆசிரியர்களிடையே புதிய உற்சாகமும், கல்வி மற்றும் ஆராய்ச்சிப் பணிகளில் மேலும் சிறப்பாகச் செயல்படுவதற்கான ஊக்கமும் ஏற்படும் என எதிர்பார்க்கப்படுகிறது.