News
கோவை அவிநாசி சாலை மேம்பாலத்தில் தீப்பிடித்து எரிந்த கார்
SimpliCity News Team · 6 days ago

Coimbatore: கோவை அவிநாசி சாலையில் உள்ள தனியார் மருத்துவமனைக்கு வந்து விட்டு ஈரோடு நோக்கித் திரும்பிக் கொண்டிருந்த குடும்பத்தினரின் கார், ஜி.டி. நாயுடு மேம்பாலத்தில் கோல்ட்வின்ஸ் விமான நிலையம் அருகே திடீரெனத் தீப்பிடித்து எரிந்த சம்பவம் பெரும் பரபரப்பை ஏற்படுத்தி உள்ளது. காரில் இருந்தவர்கள் அதிர்ஷ்டவசமாக உயிர் தப்பினர்.
ஈரோடு மாவட்டத்தைச் சேர்ந்த ஒரு குடும்பத்தினர், கோவை அவிநாசி சாலையில் உள்ள குப்புசாமி நாயுடு மருத்துவமனைக்கு சிகிச்சைக்காக வந்து விட்டு, தங்களது காரில் மீண்டும் ஈரோடு நோக்கிச் சென்று கொண்டிருந்தனர். அவர்களது கார் கோவை அவிநாசி சாலை ஜி.டி. நாயுடு மேம்பாலம் வழியாகச் சென்று, கோல்ட்வின்ஸ் விமான நிலையம் அருகே மேம்பாலத்தில் இருந்து கீழே இறங்கும் பகுதியில் வந்த போது, காரின் முன்பகுதியில் இருந்து திடீரெனக் கரும்புகை வெளியேறியதுடன் தீப்பிடித்து எரியத் தொடங்கியது.
புகை வருவதை உணர்ந்ததும் சுதாரித்துக் கொண்ட காரில் இருந்தவர்கள் உடனடியாகக் காரை நிறுத்தி விட்டுக் கீழே இறங்கியதால், யாருக்கும் எந்தவித காயமுமின்றி அதிர்ஷ்டவசமாக உயிர் தப்பினர். இதற்கு இடையே தீ மளமளவெனக் காரின் முன்பகுதியில் பரவியது. இதனைக் கண்டதும் அதிர்ச்சி அடைந்த சக வாகன ஓட்டிகள் மற்றும் பொதுமக்கள் உடனடியாகத் தீயணைப்புத் துறை மற்றும் காவல்துறைக்குத் தகவல் அளித்தனர்.
தகவலறிந்து சம்பவ இடத்திற்கு விரைந்து வந்த தீயணைப்புத் துறை வீரர்கள், தண்ணீரைப் பீய்ச்சியடித்துக் காரில் பரவிய தீயை முழுமையாக அணைத்தனர்.
இச்சம்பவம் குறித்து பீளமேடு காவல் துறையினர் வழக்குப் பதிவு செய்து, தீ விபத்திற்கான காரணம் மின்கசிவா அல்லது எரிபொருள் கசிவா என்பது குறித்துத் தீவிர விசாரணை மேற்கொண்டு வருகின்றனர்.
இச்சம்பவத்தால் மேம்பாலம் இறங்கும் பகுதியில் சிறிது நேரம் போக்குவரத்து பாதிக்கப்பட்டது.

