News
கோவை, ஈரோட்டில் ரயில்வே நிலத்தில் சரக்கு போக்குவரத்து வசதிகளை மேம்படுத்த ஒப்பந்தப்புள்ளி கோரும் தெற்கு ரயில்வே
SimpliCity News Team · 6 days ago

Coimbatore: கோவை நல்லாம்பாளையம் மற்றும் ஈரோடு விஜயமங்கலத்தில் உள்ள காலியான ரயில்வே நிலங்களில் சரக்கு சேமிப்பு மற்றும் போக்குவரத்து தொடர்பான வசதிகளை மேம்படுத்துதல், இயக்குதல் மற்றும் நிர்வகித்தல் ஆகிய பணிகளுக்கான மின்னணு ஒப்பந்தப்புள்ளிகள் (E-Tender) தெற்கு ரயில்வேயின் சேலம் கோட்ட வணிகப் பிரிவு சார்பில் கோரப்பட்டுள்ளன.
முதல் ஒப்பந்தம் கோவை–மேட்டுப்பாளையம் ரயில் வழித்தடத்தில் உள்ள நல்லாம்பாளையம் அருகே காலியாக உள்ள ரயில்வே நிலத்தில் சரக்கு சேமிப்புக் கிடங்குகள், தளவாடச் சேவைகள் மற்றும் கூடுதல் மதிப்புக் கூட்டப்பட்ட சேவைகளை உருவாக்குவது தொடர்பானது.
இரண்டாவது ஒப்பந்தம், ஈரோடு–திருப்பூர் ரயில் வழித்தடத்தில் உள்ள விஜயமங்கலத்தில் காலியாக உள்ள ரயில்வே நிலத்தில் இதேபோன்ற சரக்கு சேமிப்பு மற்றும் தளவாட வசதிகளை ஏற்படுத்துவது தொடர்பானது.
இந்த ஒப்பந்தங்களில் ஆர்வமுள்ளவர்கள் தங்களது புதிய அல்லது திருத்தப்பட்ட ஒப்பந்தப்புள்ளிகளை 2026 டிசம்பர் 11-ஆம் தேதி பிற்பகல் 3 மணி வரை இணையவழியில் சமர்ப்பிக்கலாம்.
மேலும், நேரடியாகக் காகித வடிவில் சமர்ப்பிக்கப்படும் ஒப்பந்தப்புள்ளிகள் ஏற்றுக்கொள்ளப்படாது என்றும், அவ்வாறு பெறப்படும் விண்ணப்பங்கள் நிராகரிக்கப்படும் என்றும் ரயில்வே நிர்வாகம் தெரிவித்துள்ளது.
இந்த ஒப்பந்தப்புள்ளிகள் தொடர்பான கூடுதல் விவரங்களை இந்திய ரயில்வேயின் மின்னணு கொள்முதல் இணையதளமான www.ireps.gov.in என்ற முகவரியில் தெரிந்துகொள்ளலாம்.