News
ஏழாவது கிரிமலை ஏலத்தில் முறைகேடு; கோவை மாவட்ட ஆட்சியரிடம் சமூக ஆர்வலர் புகார்
SimpliCity News Team · 6 days ago

Coimbatore: கோவை மாவட்டம் பேரூர் வட்டம் போலுவாம்பட்டி வனச்சரகத்திற்கு உட்பட்ட காப்புக்காடு எண் 2-ல் அமைந்துள்ள ஏழாவது கிரிமலையை ஏலம் விடுவதில் முறைகேடு நடப்பதாகவும், உயர்நீதிமன்ற உத்தரவுகள் முறையாகப் பின்பற்றப்படவில்லை என்றும் குற்றம்சாட்டி சமூக ஆர்வலர் செந்தில்குமார் கோவை மாவட்ட ஆட்சியர் பவன்குமார் கிரியப்பனவரிடம் புகார் மனு அளித்துள்ளார்.
அவர் அளித்துள்ள புகார் மனுவில், ஏழாவது கிரிமலையை ஏலம் விடுவதற்கு எதிராக 2015-ஆம் ஆண்டு முதல் சட்டரீதியாகப் போராடி வருவதாகக் குறிப்பிட்டுள்ளார். இதுதொடர்பாக சென்னை உயர்நீதிமன்றத்தில் தொடரப்பட்ட வழக்கில், 2021-ஆம் ஆண்டு இடைக்காலத் தடை உத்தரவு பிறப்பிக்கப்பட்டதாகவும் தெரிவித்துள்ளார்.
மேலும், 2021 டிசம்பர் 9-ஆம் தேதி அரசு அதிகாரிகள் உடனடியாகப் பதில் மனு தாக்கல் செய்ய நீதிமன்றம் உத்தரவிட்டதாகவும், டிசம்பர் 10-ஆம் தேதி பிறப்பிக்கப்பட்ட மற்றொரு உத்தரவில், அந்த ஆண்டுடன் ஏலத்தை நிறுத்திவிட்டு, அடுத்தடுத்த ஆண்டுகளில் அரசே நேரடியாக ஏலத்தை நடத்த வேண்டும் என அறிவுறுத்தப்பட்டதாகவும் குறிப்பிட்டுள்ளார்.
இந்த உத்தரவுக்கு எதிராகத் தொடரப்பட்ட மேல்முறையீட்டு வழக்கை விசாரித்த மூன்று நீதிபதிகள் கொண்ட அமர்வும், கிரிமலையைத் தனியாருக்கு ஏலம் விடக்கூடாது என்றும், அரசே ஏற்று நடத்த வேண்டும் என்றும், மனுதாரருடன் கலந்தாலோசித்து முடிவெடுக்க வேண்டும் என்றும் உத்தரவிட்டதாகப் புகாரில் தெரிவித்துள்ளார்.
ஆனால், நீதிமன்ற உத்தரவுகள் தொடர்பாக கடந்த நான்கு ஆண்டுகளாக கோவை மாவட்ட ஆட்சியர் நிர்வாகம் மற்றும் மாவட்ட வன அலுவலர் (DFO), வனப் பாதுகாவலர் உள்ளிட்ட வனத்துறை அதிகாரிகளுக்குத் தொடர்ந்து கடிதங்கள் அனுப்பியும் இதுவரை உரிய நடவடிக்கை எடுக்கப்படவில்லை எனக் குற்றம்சாட்டியுள்ளார்.
மேலும், ஒரே ஏலதாரரே தொடர்ந்து ஏலத்தைப் பெற்று வருவதாகவும், இதனால் அரசுக்கு கணிசமான வருவாய் இழப்பு ஏற்படுவதாகவும் தெரிவித்துள்ளார்.
கடந்த காலங்களில் ரூ.53 லட்சம் முதல் ரூ.54 லட்சம் வரை இருந்த ஏலத்தொகை, 2023-ஆம் ஆண்டு ரூ.1 கோடியே 37 லட்சமாக உயர்ந்ததாகவும், ஆனால் 2024, 2025 மற்றும் 2026 ஆகிய ஆண்டுகளில் ரூ.56 லட்சத்திற்கே ஏலம் விடப்பட்டுள்ளதாகவும் செந்தில்குமார் தெரிவித்துள்ளார்.
இவ்வளவு பெரிய அளவில் ஏலத்தொகை குறைந்ததற்கான காரணம் என்ன என்பது குறித்து உரிய விசாரணை நடத்த வேண்டும் என்றும், இதனால் அரசுக்கு ஏற்பட்டுள்ள வருவாய் இழப்பைக் கண்டறிந்து தடுக்க வேண்டும் என்றும் வலியுறுத்தியுள்ளார்.
மேலும் வனப்பாதுகாப்புச் சட்ட விதிகளின்படி, அடர்ந்த வனப்பகுதியில் அமைந்துள்ள ஏழாவது கிரிமலையை ஏலம் விடக்கூடாது என்றும், ஏலத்தின் மூலம் கிடைக்க வேண்டிய வருவாய் தொண்டாமுத்தூர் சட்டமன்றத் தொகுதிக்கு உட்பட்ட அருள்மிகு திருக்கோவிலின் வங்கிக் கணக்கில் முறையாகச் சேர்க்கப்பட வேண்டும் என்றும் தனது புகார் மனுவில் கோரிக்கை விடுத்துள்ளார்.
மேற்கண்ட குற்றச்சாட்டுகள் குறித்து உரிய விசாரணை நடத்தி நடவடிக்கை எடுக்க வேண்டும் என மாவட்ட ஆட்சியரிடம் வலியுறுத்தியுள்ள செந்தில்குமார், தனது புகார் மீது நடவடிக்கை எடுக்கப்படாவிட்டால் சென்னை உயர்நீதிமன்றத்தை மீண்டும் நாடி வழக்கு தொடரப்போவதாகத் தெரிவித்துள்ளார்.
