News
கோவை வடவள்ளியில் மாநகராட்சி சார்பில் வீடுகளில் மழைநீர் சேகரிப்பு கட்டமைப்பு குறித்த விழிப்புணர்வு
SimpliCity News Team · 8 days ago

Coimbatore: கோவை மாநகராட்சி மேற்கு மண்டலம், வடவள்ளி இ.பி.காலனி பகுதியில் வீடுகளில் மழைநீர் சேகரிப்பு கட்டமைப்பு மூலம் மழைநீர் சேகரிப்பது தொடர்பான விழிப்புணர்வு நிகழ்ச்சி, மாநகராட்சி ஆணையாளர் கட்டா ரவி தேஜா தலைமையில் நடைபெற்றது.
குழுத்தலைவர் ஏ.கே.தெய்வயானை தமிழ்மறை முன்னிலையில் நடைபெற்ற இந்நிகழ்வில், மழைநீர் சேகரிப்பின் அவசியம் குறித்து ரவி தேஜா விரிவாக தெரிவித்தார். காலநிலை மாற்றங்களினால், எதிர்வரும் கோடைகாலத்தை சமாளிக்கும் வகையில் மழைநீர் சேகரிப்பு பணி மிகவும் அவசியம் என்றும், கோயமுத்தூர் மாநகராட்சிக்குட்பட்ட பகுதிகளில் அமைந்துள்ள வீடுகள், வணிக வளாகங்கள், அரசு அலுவலகங்கள் மற்றும் தொழிற்சாலைகளில் மழைநீர் கட்டமைப்புகளை முழுமையாக செயல்படுத்த வேண்டும் என்றும் அவர் கூறினார்.
மழைநீரை நிலத்தடிக்கு செலுத்துவதன் மூலம் பூமியின் நீர்மட்டம் பெருமளவு உயரும் எனவும், அதேபோன்று ஆழ்துளை கிணறுகளுக்கும் தண்ணீர் கிடைக்கப்பெறும் எனவும், இதனால் மக்களின் குடிநீர் தேவையினை சீர் செய்ய முடியும் எனவும் அவர் விளக்கினார். மாநகராட்சி பகுதிகளில் புதிய கட்டிட வரைபட அனுமதியின் போது அனைத்து கட்டிடங்களிலும் மழைநீர் சேகரிப்பு கட்டமைப்பு கட்டாயமாக்கப்பட்டுள்ளது என்றும், மழைநீர் சேகரிப்பு கட்டமைப்பு இல்லா குடியிருப்புகள், நிறுவனங்கள், தனியார் தொழிற்சாலைகள் உள்ளிட்டவற்றில் மழைநீர் சேகரிப்பு அமைக்கப்பட வேண்டும் என்றும் அவர் கேட்டுக்கொண்டார். இது தொடர்பாக மாநகராட்சி தூய்மைப் பணியாளர்கள் மற்றும் கொசு ஒழிப்பு பணியாளர்கள் மூலமாக வீடுகள்தோறும் ஆய்வு மேற்கொள்ளப்பட்டு வருகிறது என்றும், மழைநீர் சேகரிப்பு கட்டமைப்பு இல்லாத வீடு அல்லது கட்டட உரிமையாளர்கள் மாநகராட்சி பணியாளர்களின் உதவிகளோடு பணிகளை மேற்கொள்ளலாம் என்றும் தெரிவித்தார்.
மேலும், டெங்கு கொசு உற்பத்தியாகாமல் இருக்க தேவையற்ற பழைய பிளாஸ்டிக் பொருட்கள் மற்றும் டயர்கள் உள்ளிட்டவற்றை அகற்றி, குப்பைகளை நான்கு வகைகளாக தரம் முறையாக தூய்மைப் பணியாளர்களிடம் வழங்க வேண்டும் என அவர் அறிவுறுத்தினார். மேற்கண்ட பணிகளுக்கு பொதுமக்கள் தங்களது முழு ஒத்துழைப்பை வழங்க வேண்டும் என்றும் தெரிவித்தார்.
அதனைத் தொடர்ந்து, டெங்கு கொசு ஒழிப்பு, மழைநீர் சேகரிப்பு கட்டமைப்பு மற்றும் குப்பைகளை நான்கு வகைகளாக தரம் பிரிப்பது தொடர்பாக பொதுமக்களால் போடப்பட்டிருந்த விழிப்புணர்வு கோலங்களை ரவி தேஜா நேரில் பார்வையிட்டார். கொசு ஒழிப்பு புகை மருந்து அடிக்கும் இயந்திரங்கள், மருத்துவ முகாம் மற்றும் பொதுமக்களுக்கு நிலவேம்பு குடிநீர் விநியோகம் செய்யப்பட்டதையும், மழைநீர் சேகரிப்பு தொடர்பான மாதிரி காட்சியினையும் அவர் நேரில் பார்வையிட்டார். மழைநீர் சேகரிப்பு கட்டமைப்பு அமைத்து, கோலங்கள் மூலம் விழிப்புணர்வு ஏற்படுத்திய பொதுமக்களுக்கு பரிசுகளும், விழிப்புணர்வு துண்டு பிரசுரங்களும் வழங்கப்பட்டன.
மேலும், அப்பகுதியிலுள்ள குடியிருப்புகளில் மழைநீர் சேகரிப்பு கட்டமைப்பு அமைத்துள்ளது குறித்து மாநகராட்சி ஆணையாளர் நேரில் பார்வையிட்டு ஆய்வு மேற்கொண்டார்.
இந்நிகழ்வின்போது, மாநகராட்சி நகர்நல அலுவலர் சுபாஷ்காந்தி, உதவி ஆணையர் நர்மதா, செயற்பொறியாளர் ஜெகன், உதவி செயற்பொறியாளர் சவிதா, மண்டல சுகாதார அலுவலர் இராதாகிருஷ்ணன், உதவி பொறியாளர் விமலா, சுகாதார ஆய்வாளர் ராஜேந்திரன், குடியிருப்போர் நல சங்கத்தினர் மற்றும் மாநகராட்சி அலுவலர்கள் உட்பட பலர் கலந்து கொண்டனர்.


