கோவை ஸ்ரீ ராமகிருஷ்ணா கல்லூரியில் மாவட்ட அளவிலான இளைஞர் கலை விழா 2026

Coimbatore: கோவை நவஇந்தியாவில் உள்ள ஸ்ரீ ராமகிருஷ்ணா கலை மற்றும் அறிவியல் கல்லூரியின் நாட்டுநலப்பணித் திட்டத்தின் சார்பில் மாவட்ட அளவிலான இளைஞர் விழா 2026, 13.11.2026 (வெள்ளிக்கிழமை) அன்று கல்லூரி வளாகத்தில் நடைபெற்றது.

இந்திய அரசின் இளைஞர் நலன் மற்றும் விளையாட்டு அமைச்சகம், தமிழ்நாடு அரசு, பாரதியார் பல்கலைக்கழகம் மற்றும் ஸ்ரீ ராமகிருஷ்ணா கலை மற்றும் அறிவியல் கல்லூரியின் நாட்டுநலப்பணித் திட்டம் (என்.எஸ்.எஸ்.) ஆகியவை இணைந்து இவ்விழாவை நடத்தின. கல்லூரியின் முதல்வர் மற்றும் செயலர் முனைவர் பி.எல்.சிவக்குமார் விழாவிற்குத் தலைமை தாங்கினார். மத்திய அரசின் 'மை பாரத்' தளத்தின் மாவட்ட இளைஞர் அலுவலர் எம்.விக்னேஷ் சிறப்பு விருந்தினராகக் கலந்துகொண்டு சிறப்புரையாற்றினார். கல்லூரியின் நாட்டு நலப்பணித்திட்ட ஒருங்கிணைப்பாளர் முனைவர் எஸ்.பிரகதீஷ்வரன் வாழ்த்துரை வழங்கினார்.

நாட்டுப்புற நடனம், நாட்டுப்புறப் பாடல், நாடகம், ஓவியம், கவிதை மற்றும் பிபிடி (PPT) ஆகிய பல்வேறு போட்டிகள் விழாவில் நடைபெற்றன. இப்போட்டிகளில் 20-க்கும் மேற்பட்ட கல்லூரிகளைச் சேர்ந்த 150-க்கும் மேற்பட்ட மாணவர்கள் ஆர்வத்துடன் கலந்துகொண்டு தங்களது திறமைகளை வெளிப்படுத்தினர்.

'வளர்ச்சியடைந்த பாரதத்தின் சவால்கள்' என்ற மையக்கருத்தில், 'நீலப் பொருளாதாரம், மனிதவள மேம்பாடு மற்றும் உலகளாவிய போட்டித்திறன்' என்ற தலைப்பில் பிபிடி போட்டி நடைபெற்றது. இதில் பங்கேற்ற மாணவர்கள் தங்களது புதுமையான சிந்தனைகளையும் கருத்துகளையும் வழங்கினர்.

மாவட்ட விளையாட்டு மற்றும் இளைஞர் நல அலுவலர் எஸ்.புவனேஸ்வரி, பல்வேறு கல்லூரிகளைச் சேர்ந்த நாட்டுநலப்பணித் திட்ட அலுவலர்களான முனைவர் வி.அறிவழகன், முனைவர் கே.மேகனா, முனைவர் ஆர்.பிரபா ஆகியோர் போட்டிகளுக்கு நடுவர்களாகக் கலந்துகொண்டனர்.

இளைஞர்களிடையே ஆளுமைப் பண்பு, ஒற்றுமை, சமூகப் பொறுப்பு மற்றும் தேசிய உணர்வை வளர்க்கும் நோக்கில் அமைந்த இவ்விழாவினை கல்லூரியின் நாட்டுநலப்பணித் திட்ட அலுவலர்களான முனைவர் த.விஸ்வநாதன், பி.கீர்த்திவாசன், முனைவர் ஏ.சஹானா பாத்திமா மற்றும் ஆர்.சூர்யா ஆகியோர் சிறப்பாக ஒருங்கிணைத்தனர்.