குழந்தைகள் தின விழா எதிரொலி: கோவை மாநகராட்சியின் 148 பள்ளிகளில் 489.5 கிலோ கேக் கவர்கள் சேகரிப்பு

Coimbatore: கோயம்புத்தூர் மாநகராட்சிக்கு உட்பட்ட 148 பள்ளிகளில் நடைபெற்ற குழந்தைகள் தின விழாவில் பயன்படுத்தப்பட்ட 489.5 கிலோ கேக் கவர்கள் தனியாக சேகரிக்கப்பட்டுள்ளதாக மாநகராட்சி சார்பில் தெரிவிக்கப்பட்டுள்ளது.

தமிழ்நாடு முதலமைச்சர் அவர்களின் உத்தரவின்படி, குழந்தைகள் தினத்தை முன்னிட்டு, கோயம்புத்தூர் மாநகராட்சிக்கு உட்பட்ட 5 மண்டலங்களில் உள்ள 100 வார்டு பகுதிகளில் செயல்பட்டுவரும் அரசு மற்றும் அரசு உதவிபெறும் பள்ளிகளில் பயிலும் மாணவ, மாணவியர்களுக்கு கேக் வழங்கும் நிகழ்ச்சி நடைபெற்றது. இந்நிகழ்ச்சியினை பிற்படுத்தப்பட்டோர் நலத்துறை அமைச்சர் வே.சம்பத்குமார், நல்லாம்பாளையம் பகுதியில் அமைந்துள்ள ராமசாமி நகர் மாநகராட்சி பள்ளியில் தொடங்கி வைத்து, பள்ளி மாணவ, மாணவியர்களுக்கு கேக் வழங்கினார்.

இந்நிகழ்ச்சியில் கோயம்புத்தூர் மாவட்ட ஆட்சித்தலைவர் பவன்குமார் கிரியப்பனார், மாநகராட்சி ஆணையாளர் கட்டா ரவி தேஜா, மற்றும் கோயம்புத்தூர் மாவட்ட முதன்மை கல்வி அலுவலர் உள்ளிட்டோர் கலந்து கொண்டனர்.

கோயம்புத்தூர் மாநகராட்சிக்கு உட்பட்ட அனைத்து பள்ளிகளிலும் குழந்தைகளுக்கு வழங்கப்பட்ட கேக் கவர்களை பள்ளி வளாகங்களில் ஆங்காங்கே வீசுவதை தவிர்க்கும் வகையில் மாநகராட்சிக்கு உட்பட்ட 148 பள்ளிகளிலும் பயன்படுத்தப்பட்ட கேக் கவர்கள் தனியாக சேகரிக்கும் சிறப்பு பணி மேற்கொள்ளப்பட்டது.

இதன்படி, மாநகராட்சி தூய்மைப்பணியாளர்கள் மூலம் பெருமளவு கழிவு உருவாக்குபவர்கள் பொறுப்பாளர் மூலம் 5 மண்டலங்களிலிருந்து கேக் கவர்கள் சேகரிக்கப்பட்டன. மேற்கு மண்டலத்திற்கு உட்பட்ட பள்ளிகளிலிருந்து 96.8 கிலோ கேக் கவர்களும், கிழக்கு மண்டலத்தில் 98.1 கிலோ கேக் கவர்களும், வடக்கு மண்டலத்தில் 98.4 கிலோ கேக் கவர்களும், தெற்கு மண்டலத்தில் 98.4 கிலோ கவர்களும் மற்றும் மத்திய மண்டலத்தில் 97.8 கிலோ கேக் கவர்களும் என மொத்தம் 489.5 கிலோ கேக் கவர்கள் சேகரிக்கப்பட்டன.

இந்த கேக் கவர்கள் மாநகராட்சி உலர்கழிவு மையங்களில் வைக்கப்பட்டு பெருமளவு கழிவு உருவாக்குபவர்களிடம் மறுசுழற்சிக்காக ஒப்படைக்கப்படவுள்ளது. இதன் மூலம் பள்ளி மாணவ, மாணவியர்களுக்கு பிளாஸ்டிக் தரம் பிரித்தல் குறித்த விழிப்புணர்வு ஏற்படுத்தப்பட்டதோடு, பிளாஸ்டிக் கவர்கள் வீதியில் போடுவது தவிர்க்கப்பட்டுள்ளது என்பது குறிப்பிடத்தக்கது என மாநகராட்சி சார்பில் தெரிவிக்கப்பட்டுள்ளது.