கோவையில் மருதமலை சாலை சீரமைப்புப் பணிகள் உள்ளிட்ட பல்வேறு பணிகளை அமைச்சர் வே. சம்பத்குமார் ஆய்வு

Coimbatore: கோயம்புத்தூர் மருதமலை பிரதான சாலையில் நெடுஞ்சாலைத்துறையின் சார்பில் நடைபெற்று வரும் தார் சாலைப் பணிகளை பிற்படுத்தப்பட்டோர் நலத்துறை அமைச்சர் வே.சம்பத்குமார் நேரில் பார்வையிட்டு ஆய்வு செய்து, பணிகளை விரைவாக மேற்கொள்ள சம்மந்தப்பட்ட அலுவலர்களுக்கு அறிவுறுத்தினார்.

கோயம்புத்தூர் மாவட்ட கண்காணிப்பு அலுவலரும் சென்னை பெருநகர வளர்ச்சி குழும உறுப்பினர் செயலருமான ராகுல் நாத் இ.ஆ.ப., மாவட்ட ஆட்சித்தலைவர் பவன்குமார் கிரியப்பனார் இ.ஆ.ப., மாநகராட்சி ஆணையாளர் கட்டா ரவி தேஜா இ.ஆ.ப. ஆகியோர் முன்னிலையில் இன்று (13.11.2026) இந்த ஆய்வு நடைபெற்றது. வடகோவை முதல் IOB காலனி வரை சுமார் 4.3 கி.மீட்டர் தொலைவிற்கு, கோயம்புத்தூர் மாநகராட்சியின் பாதாள சாக்கடை திட்டப்பணிகளுக்காக தோண்டப்பட்ட தார் சாலைகளை நெடுஞ்சாலைத் துறையின் சார்பில் சீரமைக்கும் பணிகள் நடைபெற்று வருகின்றன.

இதே குழுவினர் கோயம்புத்தூர் மாநகராட்சி தெற்கு மண்டலம் வார்டு எண்.89-க்குட்பட்ட சுண்டக்காமுத்தூர் அய்யன் குட்டையை புனரமைத்து மழைநீர் சேகரிப்பு பணிகளுக்காக பயன்படுத்துவது தொடர்பாகவும் நேரில் பார்வையிட்டனர். சுண்டக்காமுத்தூர் குளம் மொத்தம் 7.25 ஏக்கர் பரப்பளவும் 13220 மில்லியன் லிட்டர் கொள்ளளவும் கொண்டதாகும். முன்பு மழைக்காலங்களில் மாநகராட்சி எல்லைக்கு அடுத்துள்ள மலைப்பகுதிகளில் இருந்து சேகரமாகும் மழைநீர் சுற்றியுள்ள திறந்தவெளி நிலங்கள் வழியாக இக்குளத்திற்கு வந்து சேர்ந்து, குளம் முழுகொள்ளளவுக்கும் நிரம்பி வந்தது. இதனால் சுற்றுவட்டாரப் பகுதிகளில் நிலத்தடி நீர்மட்டம் உயர்ந்து, ஆழ்துளைக் கிணறுகள் மற்றும் திறந்தவெளிக் கிணறுகளில் நீர்மட்டம் போதுமான அளவில் இருந்து வந்தது.

ஆனால் தற்போது அந்தப் பகுதிகளில் காலி நிலங்கள் பெரும்பாலும் குடியிருப்பு மனைகளாக மாற்றப்பட்டு, வீடுகள் கட்டப்பட்டு, சாலைகள் அமைக்கப்பட்டு பொதுமக்களின் பயன்பாட்டில் உள்ளதால், மலைப்பகுதிகளில் இருந்து வரும் மழைநீர் குளத்திற்கு வருவது தடைபட்டுள்ளது. இதன் காரணமாக கடந்த 20 ஆண்டுகளாக இக்குளம் நீரின்றி வறண்ட நிலையில் இருந்து வருகிறது.

இதற்கு தீர்வு காணும் வகையில், மழைக்காலங்களில் குனியமுத்தூர் செங்குளம் ஏரிக்குச் செல்லும் கால்வாயில் உபரியாக வெளியேறும் மழைநீரைத் திருப்பி சுண்டக்காமுத்தூர் குளத்திற்கு கொண்டு செல்லும் திட்டம் ரூ.166 கோடி மதிப்பீட்டில் செயல்படுத்தப்பட்டுள்ளது. இதற்காக குமரன் கார்டன் பகுதியில் கோயம்புத்தூர் மாநகராட்சிக்குச் சொந்தமான இடத்தில் நீரேற்று நிலையம் மற்றும் நீர் சேகரிப்பு கிணறு அமைக்கப்பட்டுள்ளது. அங்கிருந்து சுண்டக்காமுத்தூர் குளத்திற்கு நீரைக் கொண்டு செல்வதற்காக 0.90 கி.மீ. நீளத்திற்கு DI குழாய் பதிக்கப்பட்டுள்ளது. இதனுடன் தலா 10.00 குதிரைத்திறன் (HIP) கொள்ளளவு கொண்ட 3 மின்மோட்டார்கள் நிறுவப்பட்டு, அவற்றின் மூலம் நீரை இறைத்து குளத்திற்கு கொண்டு செல்லும் வகையில் திட்டம் செயல்படுத்தப்பட்டுள்ளது.

முன்னதாக, கோயம்புத்தூர் மாநகராட்சி மத்திய மண்டலம் வார்டு எண்.32க்கு உட்பட்ட சங்கனூர் பகுதியில், ஒருங்கிணைந்த குழந்தைகள் மேம்பாட்டு சேவைகள் வளாகத்தில் செயல்பட்டு வரும் அங்கன்வாடி மையத்தில், குழந்தைகளுக்கு வழங்கப்பட்டு வரும் சர்க்கரைப் பொங்கல் தரத்தினை ராகுல் நாத், பவன்குமார் கிரியப்பனார், கட்டா ரவி தேஜா ஆகியோர் முன்னிலையில் ஆய்வு செய்து, உட்கொண்டனர்.

இந்த ஆய்வுகளின் போது, துணை மேயர் ரா.வெற்றிசெல்வன், நெடுஞ்சாலைத்துறை கோட்டப்பொறியாளர் திரிலோகசுந்தர், மாநகராட்சி உதவி ஆணையாளர்கள் நர்மதா (மேற்கு), முத்துசாமி (தெற்கு), கணேசன் (மத்தியம்), செயற்பொறியாளர்கள் ஜெகன், தேவதாஸ், ஜாக்குலின் ஜாய் லதா, உதவி செயற்பொறியாளர் சவிதா, கனகராஜ் (பொ), சரவணக்குமார் (பொ), மாமன்ற உறுப்பினர்கள் பார்த்திபன், முருகேசன், மண்டல சுகாதார அலுவலர்கள் முருகன், குணசேகரன் உட்பட பலர் உடனிருந்தனர்.