கோவை ஸ்ரீ ராமகிருஷ்ணா கலை மற்றும் அறிவியல் கல்லூரி சார்பில் போதைத் தடுப்பு விழிப்புணர்வு பேரணி

Coimbatore: கோவை ரேஸ் கோர்ஸ் பகுதியில் ஸ்ரீ ராமகிருஷ்ணா கலை மற்றும் அறிவியல் கல்லூரியின் நாட்டு நலப்பணித்திட்டம் சார்பில் போதைப்பொருளுக்கு எதிரான விழிப்புணர்வு பேரணி சிறப்பாக நடைபெற்றது.

12.11.2026 வியாழக்கிழமை நடைபெற்ற இப்பேரணியை மத்திய இளைஞர்நலன் மற்றும் விளையாட்டு அமைச்சகம், தமிழ்நாடு நாட்டு நலப்பணித்திட்ட இயக்குநரகம், கோயம்புத்தூர் பாரதியார் பல்கலைக்கழகம் மற்றும் ஸ்ரீ ராமகிருஷ்ணா கலை மற்றும் அறிவியல் கல்லூரியின் நாட்டு நலப்பணித்திட்டம் ஆகியவை இணைந்து நடத்தின.

ஸ்ரீ ராமகிருஷ்ணா கல்லூரியின் முதல்வர் மற்றும் செயலர் முனைவர் பி.எல்.சிவக்குமார் வழிகாட்டுதலில் இப்பேரணி நடைபெற்றது. இதில் கோவை மாநகர காவல்துறை உதவி ஆணையர் கோகுலகிருஷ்ணன் சிறப்பு விருந்தினராகக் கலந்து கொண்டு பேரணியை கொடியசைத்து தொடங்கி வைத்தார். பேரணிக்கு முன்னதாக நடைபெற்ற போதைத் தடுப்பு உறுதிமொழி ஏற்பு நிகழ்வில் பி4 காவல் நிலைய காவல் ஆய்வாளர் ஜெயசந்திரன் கலந்துகொண்டார்.

300க்கும் மேற்பட்ட என்.எஸ்.எஸ். மாணவ மாணவிகள் போதைப் பொருளுக்கு எதிரான பதாகைகளைக் கைகளில் ஏந்தி பேரணியாக சென்று பொதுமக்களிடையே விழிப்புணர்வை ஏற்படுத்தினர்.

ஸ்ரீ ராமகிருஷ்ணா கல்லூரியின் நாட்டு நலப்பணித்திட்ட ஒருங்கிணைப்பாளர் முனைவர் எஸ்.பிரகதீஷ்வரன், திட்ட அலுவலர்கள் முனைவர் த.விஸ்வநாதன், பி.கீர்த்திவாசன், முனைவர் ஏ.சஹானா ஃபாத்திமா, ஆர்.சூர்யா ஆகியோர் இந்நிகழ்வை சிறப்பாக ஒருங்கிணைப்பு செய்திருந்தனர்.