கோவை 2-வது வார்டில் குடிநீரை முறையாக விநியோகிக்க கோரி துடியலூர் மாநகராட்சி அலுவலகத்தை முற்றுகையிட்ட பெண்கள்

Coimbatore: கோவை மாநகராட்சி 2வது வார்டுக்கு உட்பட்ட ஈஸ்வர் பார்க் மற்றும் டி என் பி நகர் பகுதிகளில் முறையாக குடிநீர் விநியோகிக்கக் கோரி 50க்கும் மேற்பட்ட பெண்கள் துடியலூரில் உள்ள கோவை மாநகராட்சி வடக்கு மண்டல அலுவலகத்தை முற்றுகையிட்டு போராட்டத்தில் ஈடுபட்டதால் பரபரப்பு நிலவியது.

கோவை மாநகராட்சிக்கு உட்பட்ட 2வது வார்டு ஈஸ்வர் பார்க் மற்றும் டி என் பி நகர் பகுதியில் கடந்த ஒரு மாதத்திற்கு மேலாக குடிநீர் முறையாக விநியோகிப்பது இல்லை எனவும், இது குறித்து பல முறை வாட்சப் மூலம் மாநகராட்சிக்கு புகார் தெரிவித்தும் இதுவரை எந்த நடவடிக்கையும் எடுக்கவில்லை என்றும் குற்றம் சாட்டி அப்பகுதிகளைச் சேர்ந்த 50க்கும் மேற்பட்ட பெண்கள் கோவை துடியலூரில் உள்ள மாநகராட்சி வடக்கு மண்டலத்தை முற்றுகையிட்டு ஆர்ப்பாட்டத்தில் ஈடுபட்டனர். இதனால் அங்கு பரபரப்பு நிலவியது.

அவர்களிடம் பேச்சு வார்த்தை நடத்திய மாநகராட்சி அலுவலர் விரைவில் குடிநீர் விநியோகிக்க ஏற்பாடு செய்வதாக உறுதியளித்ததைத் தொடர்ந்து பெண்கள் கலைந்து சென்றனர்.

இது குறித்து பேசிய பெண்கள் கடந்த ஒரு மாதத்திற்கு மேலாக குடிநீர் முறையாக விநியோகிப்பது இல்லை, அருகில் உள்ள நகர் பகுதிகளில் வாரத்திற்கு 3 முறை குடிநீர் விநியோகிக்கின்றனர். ஆனால் தங்கள் பகுதியில் 10 நாட்களுக்கு ஒருமுறை அதுவும் மெதுவாக வருகிறது என்றும் தெரிவித்தனர்.

மேலும், இது குறித்து பல முறை வாட்சப் மூலம் மாநகராட்சிக்கு புகார் தெரிவித்தும் இதுவரை எந்த நடவடிக்கையும் எடுக்கப்படவில்லை என்றும், இது தொடர்பாக மாநகராட்சி அலுவலர் நந்தகுமாரை செல்போன் மூலம் தொடர்பு கொண்டு கேட்டால் எனது நம்பர் எப்படி உங்களுக்கு கிடைத்தது என்று மிரட்டுவதாகவும் குற்றம் சாட்டினர். இது போன்று தொடர்ந்து நீடித்தால் சாலை மறியலில் ஈடுபட உள்ளதாக எச்சரிக்கை விடுத்தனர்.