பெரியநாயக்கன்பாளையத்தில் நகைக்கடை பாதுகாப்பு குறித்து காவல்துறை கலந்தாய்வு கூட்டம்

Coimbatore: கோவை பெரியநாயக்கன்பாளையம் காவல் நிலைய எல்லைக்குட்பட்ட பகுதிகளில் உள்ள நகைக்கடை உரிமையாளர்கள் மற்றும் அடகு கடை உரிமையாளர்களுடன் காவல்துறை கலந்தாய்வு கூட்டம் நடத்தி பாதுகாப்பு ஆலோசனைகளை வழங்கியது.

பெரியநாயக்கன்பாளையம் துணை காவல் கண்காணிப்பாளர் கனகசபாபதி, காவல் ஆய்வாளர் ராஜேஷ் கண்ணன் ஆகியோர் தலைமையில் இக்கூட்டம் நடைபெற்றது.

நேற்று மதுரை தனிஷ் நகைக்கடையில் 15 கிலோ தங்க நகைகள் கொள்ளையடிக்கப்பட்ட நிலையில், தமிழகத்தில் உள்ள நகைக்கடைகளின் பாதுகாப்பை உறுதி செய்யும் வகையில் நகைக் கடை உரிமையாளர்கள், நகை அடகுக் கடை உரிமையாளர்களுடன் போலீசார் கலந்தாய்வு கூட்டங்களை நடத்தி ஆலோசனைகளை வழங்கி வருகின்றனர். அதேபோல் கோவை பெரியநாயக்கன்பாளையம் காவல் நிலைய எல்லைக்குட்பட்ட பகுதிகளிலும் இந்த கூட்டம் நடத்தப்பட்டது.

இக்கூட்டத்தில் நகைக் கடைகள் மற்றும் நகை அடகுக் கடைகளில் சிசிடிவி காமிராக்கள் இயங்கு நிலையில் உள்ளதை உறுதி செய்ய வேண்டும் என காவலாளிகள் அறிவுறுத்தினர். காவலாளிகள் அதிகமாக நியமிக்க வேண்டும் என்றும், சட்டர்கள் மற்றும் கதவுகள் திறக்கப்படும் போது அலாரம் அடிக்கும் வகையில் செய்ய வேண்டும் என்றும் அறிவுறுத்தப்பட்டது. மேலும் திருட்டு சம்பவங்கள் நடைபெறாமல் இருக்க கண்காணிப்பு பணிகளை மேற்கொள்ள வேண்டும் உள்ளிட்ட பல்வேறு ஆலோசனைகளை காவல்துறை அதிகாரிகள் வழங்கினர்.