கோவையில் மின்வாரிய களப்பணியாளர் உடல் தகுதித் தேர்வு – மின்கம்பத்தில் ஏறி திறமையை நிரூபித்த பெண்கள்

Coimbatore: தமிழ்நாடு மின் பகிர்மானக் கழகத்தின் மின்வாரிய களப்பணியாளர் பணிக்கான உடல் தகுதித் தேர்வில் பங்கேற்ற பெண்கள், ஆண்களுக்கு இணையாக மின்கம்பத்தில் ஏறியும் இரும்புத் தளவாடங்களைத் தூக்கிச் சென்றும் தங்களது உடல் திறனையும் பணித்திறனையும் வெளிப்படுத்தி அசத்தினர்.

தமிழ்நாடு மின் பகிர்மானக் கழகத்தின் களப்பணியாளர் பணிக்கான முதல் கட்டத் தேர்வில் தேர்ச்சி பெற்றவர்களுக்கான இந்த உடல் தகுதித் தேர்வு, கோவை டாடாபாத்தில் உள்ள மின் பகிர்மானக் கழக அலுவலக வளாகத்தில் நடைபெற்று வருகிறது.

கோவை மண்டலத்துக்கு உட்பட்ட மாவட்டங்களில் இருந்து மொத்தம் 356 பேருக்கு அழைப்பு விடுக்கப்பட்டுள்ளது. நவம்பர் 11ஆம் தேதி நடைபெற்ற முதல் நாள் தேர்வில் பங்கேற்க 150 பேருக்கு அழைப்பு விடுக்கப்பட்ட நிலையில், 59 பெண்கள் உட்பட 139 பேர் பங்கேற்றனர்.

பழுதுபார்க்கும் கருவிகளை இடுப்பில் கட்டிக்கொண்டு மின்கம்பத்தில் ஏறுவது உள்ளிட்ட சவாலான பணிகளையும் பெண்கள் மேற்கொண்டனர்.

மின்கம்பத்தில் கால் வைப்பதற்கான கட்டையைப் பொருத்தி, இடுப்புக் கயிற்றைக் கட்டிய பின்னர் கீழே இறங்க வேண்டும். இந்தப் பணிகளை எட்டு நிமிடங்களுக்குள் முடிப்பவர்கள் உடல் தகுதித் தேர்வில் தேர்ச்சி பெற்றவர்களாகக் கருதப்படுவார்கள்.