கோவை ஆட்சியர் அலுவலகம் முன்பு பணி நிரந்தரம் கோரி எம்ஆர்பி செவிலியர்கள் ஆர்ப்பாட்டம்

Coimbatore: பணி நிரந்தரம் உள்ளிட்ட பல்வேறு கோரிக்கைகளை வலியுறுத்தி தமிழ்நாடு செவிலியர்கள் மேம்பாட்டு சங்கம் சார்பில், எம்ஆர்பி செவிலியர்கள் கோவையில் ஆர்ப்பாட்டத்தில் ஈடுபட்டனர்.

கோவை மாவட்ட ஆட்சியர் அலுவலகம் அருகில் வியாழக்கிழமை அன்று நடைபெற்ற இந்த ஆர்ப்பாட்டத்திற்கு மாவட்டத் தலைவர் ஆர்.ராமலட்சுமி தலைமை தாங்கினார்.

இதில், தொகுப்பூதியத்தில் பணியாற்றி வரும் 6500 செவிலியர்களையும், நிரந்தர செவிலியர்கள் பெறும் முழுமையான காலமுறை ஊதியத்துடன் பணி நிரந்தரம் செய்திட வேண்டும் என்று வலியுறுத்தப்பட்டது.

தற்காலிக ஒப்பந்த முறையில் பணியாற்றும் அனைத்து செவிலியர்களையும் எம்.ஆர்.பி மூலம் பணி நிரந்தரம் செய்திட வேண்டும் என்றும், புதிதாக உருவாக்கப்படும் செவிலியர் பணியிடங்களுக்கு பணியிட மாறுதல் கலந்தாய்வு நடத்திட வேண்டும் என்றும் கோரிக்கை வைக்கப்பட்டது.

அரசு மருத்துவமனைகள் மற்றும் அரசு செவிலியர் கல்லூரிகளில் செவிலியர்கள் மற்றும் செவிலியர் போதகர்களை நிரந்தர பணியிடங்களில் பணியமர்த்த வேண்டும் என்றும் கோரி முழக்கங்களை எழுப்பி ஆர்ப்பாட்டத்தில் ஈடுபட்டனர்.

இதில் மாவட்ட நிர்வாகிகள் என்.கிருத்திகா, ஏ.சித்ரா உள்ளிட்ட திரளான செவிலியர்கள் பங்கேற்றனர். நிறைவாக என்.வினோதினி நன்றி கூறினார்.